Lannen Enternasyonal Bann Pti Leta Zil : Sesel en Nasyon Zil Determinen |25 February 2014

‘Nou tou nou annan en rol pour zwe dan sa tenm’

Sesel in depi lontan azir koman en pionye dan promosyon ek devlopman bann pti leta zil. Annefe, nou bann dirizan politik osi byen ki sivil in kontinyelman e a plizyer repriz anmenn sa size lo bann foronm enternasyonal, ziska kot Nasyon Zini.

Nou zefor koman en pei e en pep in sirman komans port fri lo sa size, kot nou’n vin en lavwa deplizanpli for e deplizanpli ekoute lo lasenn enternasyonal. An 2012, Lorganizasyon Nasyon Zini ti vot en rezolisyon ki ti demande ki lannen 2014 i dedye a bann pti leta zil. Sa kanpanny ti ofisyelman lanse par Sekreter Zeneral Nasyon Zini Ban Ki-moon, yer New York. I annan pour bi atir latansyon lo bann defi spesifik bann pti leta zil, sirtou defi proteksyon lanvironnman e patrimwann natirel dan konteks devlopman dirab. Bann pti leta zil parey Sesel, pe osi demande ki zot ganny trete diferaman e dapre zot konteks spesifik lo nivo enternasyonal.

Azoute a zefor ki Seychelles ti pe deza anmennen dan sa lalit, en lot gran kontribisyon nou pei i sirman pour dedye nou tenm nasyonal pour sa lannen a sa koz.

Tenm nasyonal pour sa lannen, «Lannen Enternasyonal Bann Pti Leta Zil : Sesel en Nasyon Zil Determinen» ti ofisyelman lanse par tyermenn komite tenm nasyonal, Minis Idith Alexander, dan en pti seremoni kot Sant Konferans Enternasyonal (ICCS) yer swar.

Seremoni ti asiste par Prezidan James Michel, Vis-Prezidan Danny Faure, Spiker Lasanble Nasyonal Patrick Herminie, Sef Ziz Fredrick Egonda-Ntende, bann minis, manm Lasanble Nasyonal e lezot envite.

Minis Alexander ti dir ki an adoptan sa tenm, Sesel i zwenn ansanm avek sa 52 lezot pti leta zil dan lemonn pour souliny e selebre nou karakteristik prensipal koman en nasyon zil. I ti azoute ki Sesel i anvi montre son determinasyon pour sirmont tou defi e anmenn plis progre ekonomik e sosyal pour nou pep e se sa mesaz ki koman en pei, nou anvi partaz avek lakominote enternasyonal pandan sa lannen.

Minis Alexander ti fer remarke ki alor ki bann gran pei in realiz lafors bann pti leta zil, i neseser pour sa bann pti pei travay ansanm pour kapab fer fas avek bann problenm mondyal, tel ki sanzman klima, krim organize, trafik imen e trafik drog, e anmenmtan sezi bann loportinite pozitif ki en lalyans mondyal i kapab anmennen, par egzamp dan komers enternasyonal, lesanz lenformayson e teknolozi.

Lo nivo nasyonal, i ti lans en lapel a tou Seselwa pour adopte bann bon valer e fer sa tenm vin en sikse. I ti soulinyen ki parey nou’n kapab reisi dan nou reform ekonomik, sa pou permet nou reisir dan nou demars pour protez nou lanvironnman, reste an bonn sante, atir plis touris dan nou pei osi byen ki lit kont fleo piratri.

«Nou tou nou annan en rol pour zwe dan sa tenm. Pour nou kapab kontinyen avanse nou bezwen reste determinen pour repran nou bann valer ki gard nou ansanm koman en nasyon. Anfas bokou fleo sosyal nou bezwen travay dir pour renouvle nou valer spirityel e moral dan lafanmir e dan kominote. En nasyon ki annan bann bon valer i en nasyon ki for anfas defi e ki kontinyen progrese. Mon osi oule fer en lapel avek tou zenn pour met zot devlopman personnel e profesyonnel koman zot priyorite akoz se zot lavenir Sesel. […] Lafanmir i reste koman pilye devlopman nou zanfan. Mon demann tou paran e gardyen nou zanfan, pour renouvle zot determinasyon pour ankadre zot zanfan, edik zot bann bon konportman, bon savwar fer; siport zot pour devlop bann bon lidantite ki ava rann zot for pour zot kapab sirmont bann defi ki lavi i ava anmenn pour zot,» Minis Alexander ti dir.

Tyermenn komite tenm nasyonal in osi eksplike ki annakor avek lannen enternasyonal bann pti leta zil deklare par Nasyon Zini, tenm nasyonal pour sa lannen i annan pour lobzektif sansibiliz dimoun plis ankor lo defi e difikilte ki bann pti leta zil pe rankontre.

Minis Alexander in anonse ki dan bann aktivite ki pou organize pandan sa lannen, sa tenm enternasyonal pou ganny adapte e pou selebre dan konteks Sesel e Seselwa.

Seremoni yer ti enkli sanson ek ladans avek tenm determinasyon dan proteksyon nou lanvironnman ek nou leritaz. En prozeksyon video ti montre listwar nou pei, e osi Sesel koman en pti nasyon zil ki vreman determinen pour protez son lanvironnman.

Logo tenm nasyonal 2014 -- ki montre Sesel dan son kouler nasyonal pe al an avan dan lemonn parmi bann lezot pti leta zil -- ti osi devwale. Seremoni ti termin avek lenterpretasyon sanson tenm nasyonal 2014, «Nou determinen» par Jean-Marc Volcy.

Lo non tou bann legliz dan pei, Per Katolik David Alcindor ti  osi demann tou Seselwa pour met tou nou diferans dekote e pour travay pour byennet nou pei. I ti remersye Bon Dye pour sa ki nou’n akonplir ziska prezan e priye ki i beni nou nasyon e gid nou dan tou sa ki nou fer alavenir.

Bann portre ki akonpanny lartik i montre en pe lanbyans kot sa seremoni yer.