Follow us on:

Facebook Twitter LinkedIn YouTube

Archive -Seychelles

Mesaz Lider Lopozisyon dan Lasanble Nasyonal David Pierre |08 March 2014

Malgre defi bann madanm Seselwa in toultan pran zot prop desten dan zot lanmen’

Lider Lopozisyon dan Lasanble Nasyonal David Pierre in dir ki malgre bann defi sosyal bann madanm Seselwa in toultan pran zot prop desten dan zot lanmen.

Msye Pierre in dir sa dan son mesaz alokazyon Lazournen Enternasyonal bann Madanm ozordi.

Mesaz Msye Pierre pour sa lokazyon i lir koumsa:

«Ozordi nou pe selebre Lazournen Enternasyonal bann Madanm, e mon zwenn ansanm avek larestan lemonn an solidarite pour drwa imen, dignite e egalite. E mon salye tou madanm Seselwa ki pe kontinyen pouse pour anmenn bann vre sanzman neseser dan zot lavi, dan zot kominote, kot zot lakour, dan zot travay e pour zot pei.

«Lazournen Enternasyonal bann Madanm ki selebre lakonplisman bann madanm lo nivo sosyal, ekonomik e politik in anmenn bokou lakonplisman pozitiv me i ankor annan bokou pour sak nou konman bann endividi, lorganizasyon e menm gouvernman pour kontinyelman fer pour ‘empower’ nou bann madanm pour plis lavansman.

«I annan bokou sanzman ki pe arive dan lemonn ki afekte bann madanm. Me sa ki mon kontan pour dir se ki bann madanm Seselwa in toultan pran zot prop desten dan zot lanmen. Se sa ki ozordi dan Sesel nou vwar bann madanm in progrese e ozordi nou vwar zot pe tenir bann pozisyon kle dan pei tel ki dan parlman, dan cabinet of ministers, dan bann gran lendistri ek lakonpannyen e dan bann pti biznes kot laplipar letan pe ganny dirize par bann madanm.

«I annan bokou inegalite ant bann msye ek bann madanm atraver lemonn; Sesel nou lwen e nou en legzanp enternasyonalman. Nou bann madanm i annan menm drwa ki bann msye pour devlop zot kapabilite ek potansyel. I difisil pour krwar me i vre ki i annan telman bokou madanm dan sa lemonn ki pa pe rezouir benefis en tel devlopman.

«Mon felisit tou madanm travayer Seselwa pour zot zefor eksepsyonnel ki zot in anmennen pour nou pei. Mon egalman felisit zot pour adapte avek bann sanzman ki zot bezwen fer fas avek, sa i demontre zot matirite e ki fason zot kapab kas tou baryer ki dan zot semen.

«Mon konnen ki a ler aktyel dan nou pei, pa tou ki parfe e bann madanm pe fer fas avek bokou defi sosyal ki pe afekte zot tel ki lapovrete, prostitisyon, vyolans domestik, labi sibstans, ek lezot.

«Se sa alor ki mon pou lans en lapel avek gouvernman pour met plis zefor pour lager kont sa bann fleo sosyal ki pe afekte nou bann madanm ek zenn fiy. Nou bezwen bann madanm ki kapab soutenir bann fanmir stab, bann ki pou kapab elve nou bann zanfan, bann ki pou kapab travay e donn en koudmen bann msye pour bouz  pei pli devan.

«Gouvernman ek lasosyete sivil i merit al dan rasin ek sours sa bann fleo e rod solisyon. Annou relev moral bann madanm, annou kre plis loportinite pour ki bann madanm i kapab avanse. Annou ouver sa bann laport e les bann madanm kontinyelman devlope e ankouraz zot pour vin pli aktiv ankor dan nou devlopman sosyal.

«Mon profite dan mon mesaz pour remersye tou bann madanm ki’n la oparavan ki’n tras semen tel ki nou manman ek nou granmanman, pour zot kouraz, zot determinasyon ek kontribisyon ki zot in fer pour nou pei.
«Lo sa not mon swet tou madanm Seselwa en bonn fet.»

» Back to Archive