Follow us on:

Facebook Twitter LinkedIn YouTube

Archive -Seychelles

Mesaz Tyermenn Lig bann Madanm Parti Lepep, Madanm Mitcy Larue, alokazyon Lazournen Bann Madanm |08 March 2014

‘Mon remersye bann madanm pour zot kontribisyon enorm dan konstriksyon sa Sesel modern’

Tyermenn Lig Bann Madanm Parti Lepep, Mitcy Larue in remersye bann  madanm pour zot kontribisyon enorm ki zot in anmennen e pe kontinyen anmennen pour ede batir sa Sesel modern.
In dir sa dan en mesaz spesyal pour lokazyon Lazournen Enternasyonal bann Madanm ki ozordi, Sanmdi le 8 Mars.
Mesaz Madanm Larue i lir koumsa:

«Alokazyon Lazournen Enternasyonal bann Madanm mon oule swet tou madanm Seselwa dan Sesel ensi ki bann aletranze e tou lezot madanm etranze ki pe viv dan nou pti pei en bon lafet madanm.

«Mon oule remersye zot pour zot kontribisyon enorm ki zot in anmennen e pe kontinyen anmennen pour ede batir sa Sesel modern. 50-an pase bann madanm ti touzour o fron batay pour lalit pour zot drwa – pour kapab ganny zot dignite. Zot in fer bokou e ozordi 50-an plitar, nou tou nou pe rezouir lo sa lalit for ki zot ti kontinyelman anmennen.Mon oule salye zot e dir zot mersi pour zot determinasyon ek kontribisyon.

«Ozordi dan sa Nouvo Sesel bann madanm in ganny ‘empowered’ e zot pe okip bann pozisyon leadership e kle dan lasosyete. Bann madanm i partou koman minis, sekreter prensipal, sef  egzekitiv, politisyen, dan sekter piblik, prive e menm proprieter zot prop biznes. Zot pe fer menm travay ki zonm e ki lontan zot pa ti kapab fer.

«Nou annan bann madanm Seselwa ki pe debrouye e lev nou paviyon e nou pei tre o dan plizyer pei aletranze. Bann madanm ki pe pran responsabilite zot zanfan o serye. Bokou travayer lasante i madanm ki pe travay dir, lannwit koman lizour.
 
«Sa platform devlopman ki’n met nou pep o sant son devlopman in fer ki ozordi nou fyer nou lakonplisman. «Nou salye tou bann madanm ki’n pran seryezman sa bann loportinite pour ariv kot zot ete ozordi.

«Lefe ki Prezidan James Michel in deklar sa lannen Sesel koman en pti leta zil en nasyon determinen, mon demann tou madanm pour fer en refleksyon profon lo sa bann pwen swivan:

•    Nou bann madanm nou’n touzour senm lanmour ek linite;

•    Nou’n touzour annan respe pour bann aze;

•    Nou’n touzour annan en leker partaze;

•    Nou’n touzour pran swen e responsabilite nou zanfan;

•    Nou’n touzour travay dir avek determinasyon ek motivasyon;

•    Nou’n touzour sa model dan nou lakour, lakominote e pei.

«Annou get seryezman kote nou ete ozordi vizavi sa bann bon valer. Mon demann zot tou pour seryezman e profondeman anmenn bann sanzman pozitiv dan zot lavi personnel, familyal, spirityel, travay e dan zot kominote. Pran responsabilite zot lavi dan zot prop lanmen. Pran zot rol travayer e manman avek plis viger, responsabilite e devosyon. Edik zot zanfan lo bann bon valer moral, spirityel.
 
Vin sa model pour nou zanfan. «Donn koudmen pour ede edik nou bann zenn  kont bann fleo sosyal ki pe afekte zot.

«Ed bann ki pli vilnerab dan sosyete.

«Ede pran swen avek nou bann dimoun aze.  

«Ede pour edik e responsabiliz nou zenn, zonm, la popilasyon pour pran swen avek zot lasante.

«Bann madanm se zot ki pli kapab vreman fer sa diferans pozitiv dan nou sosyete.

«Ozordi menm, annou angaz nou pour anmenn sa sanzman pozitiv. Vin bann edikater, senm sa vre lanmour ek linite partou kot zot ete, dan lakour, dan travay, dan lakominote e dan pei. Son benefis dan lavenir pou imans lo lavi sa zenerasyon fitir e en Sesel modern.

«Mon swet zot tou kouraz e determinasyon dan zot travay toulezour, e ki Bondye i beni tou madanm avek lasante, lafors ek determinasyon pour zwe sa rol enportan, konman pilye nou sosyete.»

» Back to Archive