Kominike Lapolis |23 April 2014
Lapolis in raporte ki madanm Noellie Serret aze 84-an ki ti reste Pointe Larue ti mor Dimans le 20 Avril 2014 swivan en aksidan vizavi Flat Mirabelle, Pointe Larue.
Sa aksidan ti ganny raporte avek Lapolis ver 6er55 aswar.
Madanm Serret ki ti’n ganny dimal serye dan latet apre ki i ti’n ganny tape avek en pick-up, ti ganny deklare mor ver 9er30 diswar Lopital Sesel kot i ti’n ganny transporte par lanbilans pour resevwar tretman.
En zonm 33-an ki reste Anse Aux Pins, sispe dan sa ka fatal e ki ti ganny arete depi Dimans swar menm, ti pas ankour Lendi kot in ganny rimann ziska Zedi le 24 Avril.
Tes fer lo sa sispe, ki ti pe dray sa pick-up, in demontre ki nivo lalkol dan son lekor ti parlao limit preskrir par lalwa.
Lanmor madanm Serret i setyenm ki lapolis in anrezitre depi ki lannen in konmanse.
Sa i selman enn an mwens ki lakantite anrezistre pour lannen 2013.
****
Dan en lot lensidan ki ti ganny raporte Dimans le 20 Avril 2014 ver 2er35 bomaten, en zonm aze 26-an ki reste Baie Lazare e ki ti sorti kot Pirates Arms pour al direksyon Sid, ti fer direksyon Lari Francis Rachel olye fer letour rond pwen kot Lorloz. Arivan vizavi Lesplannad, i ti bat dan en poto ek siny trafik.
Dapre sa drayver ki ti pe ganny akonpannyen par son frer aze 29-an, i ti’n tonb dormi lo volan. Son frer in sibir en lazanm kase tandis ki sa drayver in ganny blesir lo son labous. Drayver ki ti ganny arete e detenir Dimans swar ti ganny large Lendi.
Ankor enn fwa tes fer lo sa drayver ti demontre ki nivo lalkol dan son lekor ti parlao limit ki ganny preskri par lalwa.
****
Lapolis in raporte ki le 19 Avril 2014, en fiy 16-an ki reste Anse Royale ti ganny admit Hermitte Ward, Lopital Sesel avek en lipye kase apre ki transpor ki i ti ladan ti savire dan en ranpar Montagne Posée. Dan sa transpor ti osi annan en lot fiy 16-an ek en garson 16-an ki tou le de in ganny blesir leze. Zot ti ganny trete e plitar ganny large. Sa aksidan ti ganny raporte avek lapolis ver 7er40 aswar.
Drayver sa transpor i en zonm 26-an ki reste Beau Vallon.
****
En zonm aze 31-an ti ganny transporte Lopital Sesel par son vwazen apre ganny large apre ki son boper ti bles li Dimans swar. Sispe, sa boper 54-an, ti ganny arete Lendi 10er24 bomaten e pe ganny detenir.
Dapre lanket preliminer, sa lensidan blese ki ti ganny raporte avek lapolis ver 8er43 Dimans swar ti rezilta en largiman kot en lakour Le Niol.
Lapolis pe kontiny zot lanket dan sa lensidan.
****
Lanket pe egalman ganny fer dan lensidan kot zonm 34-an ki reste Perseverance ti ganny admit Doffay Ward, Lopital Sesel, apre ki lapolis ti’n anmas li dan semen obor kot l’Alliance Francaise apre ki i ti’n tonbe sorti dan en pick-up.
Lensidan ti ganny raporte ler en zofisye lapolis ki ti pe fer patrol Bois de Rose ti vwar sa zonm pe alonze lo semen. Dapre sa zonm i ti’n ganny pasaz me apre i pa ti konnen ki’n arive apre sa.
Lapolis ti transport sa zonm kot Sant Lasante Rivyer Anglez kot i ti apre ganny transporte Lopital Sesel. Son kondisyon pour lemoman i stab
Sa lensidan in ganny raporte arive apremidi Zedi le 18 Avril.
****
Lapolis pe egalman fer lanket dan en lensidan kot en garson 17-an ki reste Corgat Estate ti ganny transporte Sant Lasante Rivyer Anglez, ganny trete e ganny large Vandredi pase apre ki tonton son girlfriend ti’n pik li swivan en bagar Belonie.
Sispe, en zonm 35-an, ti ganny arete Vandredi menm, ganny kestyonnen apre ganny large Sanmdi le 19 Avril.
Dapre lanket preliminer, sa lensidan blese ki ti ganny raporte avek lapolis ver 6er25 Vandredi swar ti an rezilta en largiman kot en lakour Belonie.
Lapolis pe kontiny lanket dan sa lensidan.