Artis i ganny envite pour pran par dan en gran Arts Fair |24 April 2014

Konsey Nasyonal pour Lar pe envit tou artis dan diferan domenn lar e osi zanmi artis pour vin zwenn zot dan en gran ‘Arts Fair’ dan karpark Libreri Nasyonal Vandredi le 2 ek Sanmdi le 3 Me 2014 depi 10er bomaten ziska 8er diswar.

« Pandan sa fair tou travay artistik tel ki lapentir, skilptir, fotografi avek portre ankadre pou anvant. Pou osi annan drama parey stand-up comedy, pyes teat kot pou annan televizyon ki pe osi pas bann pyes teat ki’n deza ganny zwe lo zot lekran, poezi, osi byen ki resital poenm. Triko ek liv kreol ki’n deza pibliye, osi byen ki bookmark pou osi anvant,» Madanm Denise Victor, responsab pour devlopman lar dan Konsey Nasyonal pour Lar, ti eksplike.

Madanm Victor i envit tou dimoun, espesyalman tou artis, pour vin partisip dan sa fair kot pou osi annan bokou lanmizman tel ki jamming session e osi animasyon par mizisyen ki pou enterpret bann sanson.

«Bann zanfan pa’n ganny oubliye,» Madanm Victor i dir. «Pou osi annan divertisman pour zot tel ki penn figir, dekoupe e fer dekorasyon avek papye par egzanp. Annefe pou annan divertisman ek lanmizman pour tou laz,» Madanm Victor ti fer resorti.

Alor randevou i Vandredi le 2 ek Sanmdi le 3 Me aparti 10er bomaten dan karpark Libreri Nasyonal !