Kominike Lapolis |30 April 2014
En zonm aze 60-an ti ganny admit dan younit swen entansif Lopital Sesel Dimans le 27 Avril 2014 apre ki i ti ganny pouse, tonbe e bat son latet ater. Kondisyon sa viktim ki en zabitan Port Glaud in ganny dekri koman kritik. Sa lensidan ti ariv pandan en fonksyon prive kot sant kominoter Port Glaud.
De sispe, en zonm 20-an avek en garson 16-an in ganny arete, ganny anmenn ankour Lendi kot zot in ganny rimann pour en semenn. Antretan lapolis pe kontinyen avek zot lanket dan sa zafer.
****
Lapolis in raporte ki en madanm 25-an ki reste Grand Anse Mahé ti ganny trouve san konnesans par zofisye lapolis lo Lari Benezet apre ki i ti’n ganny bate lo karpark Lari Quincy par en group garson aze ant 19 a 24-an.
Sa lensidan ti ganny raporte ver 5er20 granmaten Lendi le 28 Avril.
Dapre lenformasyon lensidan ti arive ler sa fiy ki ti sorti ‘Barrel Discothèque’ ti ganny atake par bann zenn garson ki ti dan en pick-up ble. Touzour dapre viktim sa lensidan, zot ti atrap li e tap li dan son figir kot apre i ti perdi konnesans.
Avek led zofisye lapolis, lanbilans ti transport sa fiy Lopital Sesel kot i ti reganny konnesans, ganny tretman apre ganny large.
Lapolis pe fer lanket dan sa lensidan.
****
Lapolis in osi raporte ki Pierre Ernesta aze 39-an, en travayer L’Union Estate, La Digue, e ki reste Belonie, ti mor sibitman Dimans. Ernesta ki ti’n desann Mahé ti ganny sertifye mor ver 9er bomaten par dokter kot Sant Lasante Rivière Anglaise, landwra kot i ti’n ganny transporte pour lasistans medikal apre ki i ti’n ganny trouve san konnesans dan lavarang kot li Belonie.
Ti ver 6er30 Dimans bomaten ki lapolis ti ganny enformen lo sa lensidan e deswit i ti reponn lapel pour lasistans.
Sete lapolis ki ti asiste pour anmenn Ernesta lopital. Lanket pe fer annatandan rezilta letopsi pour determin lakoz son lanmor.
****
En zonm 19-an ki reste Morne Blanc, Port Glaud, ti ganny trete kot Lopital Sesel apre ganny large Dimans granmaten apre ki i ti’n ganny atake e blese par en enkonni dan zanmerant Codevar. Viktim sa lensidan ti raport son lekor Kordgard Santral avek blesir dan figir, lebra ek zepol.
****
Lapolis in raporte ki Sanmdi le 25 Avril 2014, en zonm 36-an ti ganny admit dan D’Offay Ward, Lopital Sesel avek blesir lo son zepol kote gos apre ki i ti ganny pike kot ‘Barrel Discotheque’. Ti anviron 4er10 bomaten ki lapolis ti ganny enformen lo sa lensidan. Dapre sa viktim, i ti ganny atake par trwa zonm. Lapolis in aret en sispe an koneksyon avek sa ka e lanket i an progre.
****
Dan en lot lensidan separe Dimans le 27 Aril 2014, en zonm Kenyan aze 49-an ki reste Beau Vallon ti ganny admit dan D’Offay Ward, Lopital Sesel avek blesir deryer son latet apre ki i ti’n tonm dan larivyer sorti anler lo miray obor restoran Marie-Antoinette.
Ti ver 4er35 bomaten ki lapolis ti resevwar lapel pour lasistans e ler zot ti ariv dan sa landrwa zot ti vwar li vant anler dan larivyer. Avek lasistans ‘paramedics’ e zofisye Lazans Servis Tenny Dife ek Sovtaz, sa viktim ti ganny ranmase e transporte lopital.
****
Finalman Dimans le 27 Avril 2014, en madanm 28-an ti fer konplent ki anviron 1er11 bomaten ler i ti obor ‘Barrel Complex’ en zonm aze 37-an ki reste Belonie ti lager ek li e tap li koud pye dan son vant e an rezilta in tap avek vitrin en magazen e koz domaz. Sa sispe ti ganny arete, kestyonnen e plitar ganny large.
****
Konsernan aksidan en total 15 ka in ganny raporte pandan wikenn e napa ki’n serye e napa personn ki’n ganny admit lopital. Parmi sa 15 ka 2 ladan drayver ti annan dan lekor nivo lalkol parlao limit preskri par lalwa.
Lapolis i dir i satisfe lafason son loperasyon in deroule an relasayon avek lakantite aktivite e kantite dimoun ki ti’n desann dan lavil pandan wikenn.