En Moman Avek Prezidan - ‘Konsiltasyon i en fason pour ed gouvernman fer son travay pli byen’ |08 July 2014
Prezidan James Michel in dir ki sa foronm konsiltatif ki i pe al lanse prosennman i en fason pour bann dirizan okouran laspirasyon bann dimoun dan en lot form a en lot nivo.
I osi en fason pour ganny diferan lide ki ava ed gouvernman fer pli byen son travay.
Prezidan Michel ti dir sa pandan progranm En Moman Avek Prezidan ki ti pase lo televizyon SBC Dimans swar.
I bon note ki Prezidan Michel ti anons kreasyon en tel foronm dan son diskour alokazyon Lazournen Nasyonal le 18 Zen sa lannen.
Dan son diskour Prezidan ti dir : “Mon’n konsilte e mon’n reflesi bokou. Mon’n vwar li neseser, dan faz kot nou’n arive, dan lentere nou nasyon, konstitye en foronm konsiltatif ki ava kontribye pour nou reste konnekte avek lepep.”
“Konsiltasyon i lakle pour linite nasyonal. Konsiltasyon i ed gouvernman pran bann bon dezisyon. Atraver konsiltasyon, lademokrasi i sorti venker. Se sa, e inikman sa, ki’n motiv mwan pran sa desizyon.”
Letan i ti pe koz lo sa size dan progranm En Moman Avek Prezidan, Msye Michel ti dir ki en demokrasi fonksyonnel se en demokrasi ki krwar dan konsiltasyon; se en demokrasi ki pratik konsiltasyon non selman a en nivo me a otan nivo posib.
“Se sa ki donn ou en demokrasi fonksyonnel, en demokrasi ki marse e en demokrasi ki efektiv,” Prezidan Michel ti dir ler i ti pe met lanfaz lo rezondet en tel foronm.
Prezidan ti osi eklersi ki sa foronm pa pe al ranplas Lasanble Nasyonal ki annan son fonksyon e ki pou kontinyen. I ti osi dir ki bann lezot konsey, komite ek foronm ki egziste zot osi zot pou kontinyen fer zot travay e osi son bann konsiltasyon ki i fer ek diferan kous sosyete pou kontinyen. “Se atraver sa bann diferan konsiltasyon ki leadership en pei i kapab okouran laspirasyon son pep e ki gouvernman i kapab realiz zot.
Napa person ki annan monopoli lo lide. Nou tou nou annan en kontribisyon pour nou fer dan en fason ki byen. Nenport ki kontribisyon ki ganny fer e valab i ed gouvernman kapab fer pli byen,” Prezidan Michel ti dir.
I ti dir ki sa foronm o nivo, prezide par limenm, pou ganny konpoze par serten endividi – pe enport zot lapartenans politik – ki’n disteng zot lekor par zot konnesans, zot leksperyans, zot bonn-volonte ek zot servis a lanasyon.
Rol sa foronm se deliber lo tou kestyon ki tous direkteman a lentere nasyonal, e fer proposizyon konkret ki gouvernman i a pran seryezman an konsiderasyon.
Manm sa foronm pou antyerman lib pou debat okenn kestyon ki konsern lavenir Sesel dan nenport ki domenn: linite nasyonal, enklizivite, politik, ekonomik, sosyal, moral, kiltirel...
“Sa foronm … a ed nou reflesir ansanm e i a ed gouvernman dan son bann desizyon ankor dan lespri pour anmenn plis linite, kre sa sosyete enklizif ki apre tou se sa ki fer en nasyon e kre sa lespri apartenans,” Prezidan ti dir.
Prezidan ti osi fer remarke ki ler otan dimoun posib i ganny konsilte, i koze, i partaz son nide e meyer nide i ganny met ansanm, aksyon i apre ganny pran ki dan lentere pei e lepep annantye.
Ler i ti ganny demande si lezot dimoun ki pa lo foronm i osi kapab kontribye, Prezidan Michel ti dir ki endividi avek serten kapasite ek konnesans zot osi kapab kontribye keksoz. Me i ti fer rapel ki aktyelman i annan plizyer lorganizasyon deza kot dimoun i kapab eksprim zot lopinyon tel ki Lungos, lorganizasyon relizye, lasanm komers pour bann biznes, parmi lezot ankor.
Prezidan ti dir ki deza in ganny plizyer demann par bann dimoun ki ti a enterese partisipe.