Follow us on:

Facebook Twitter LinkedIn YouTube

Archive -Fishing and Agriculture

Proze redevlopman Anse Royale |14 July 2014

 

 

 

Peser i donn zot pwenndvi lo fasilite lapes

 



Bann peser Anse Royale in ganny sans vwar e donn zot pwenndvi lo bann fasilite lapes ek lezot devlopman komersyal ki pe ganny propoze dan en konsep pour redevelop Anse Royale santral.

Sa ti dan en miting konsiltativ ki ti fer Sanmdi apremidi  kot bann o zofisye dan Minister responsab pour Later ek Lakaz osi byen ki Lotorite Lapes Sesel ti zwenn bann peser ankor enn fwa pour ekout  e pran an kont zot komanter, propozisyon ek pwenndvi lo bann fasilite dan sa konsep plan redevlopman.

Sa miting konsiltativ pe fer an 2 faz. Demen apremidi tou zabitan Anse Royale pe ganny envite pour asiste en lot miting kot la zot pou ganny sans vwar e donn zot pwenndvi lo konsep pour redevlopman beach park.

Bann zofisye ki ti la pour ekout bann peser ti enkli sekreter prensipal dan Minister Later ek Lakaz Msye Joseph François, sekreter prensipal pour Planifikasyon ek Lenplimantasyon Proze dan sa menm minister Msye Yves Choppy osi byen ki depite sef egzekitif Lotorite Lapes Sesel Msye Roy Clarisse.

Manm Lasanble Dereck Samson ek administrater sa distrik Rubina Ernesta ti osi prezan.
Sa miting i swiv enn ki ti fer avek bann peser lo sit kot zot vann pwason dan zalantour Restoran Kaz Kreol lannen pase e sa ti apre ki zot ti’n fer plizyer propozisyon, met devan plizyer sizesyon ek pwenndvi lo sa ki zot ti ava anvi vwar koman fasilite lapes dan zot distrik.

A prezan lotorite in reanmenn sa plan ki’n fini ganny konsevwar pour zot dernyen komanter avan Konsey Minis i finaliz li.

«Sa konsep i montre ki gouvernman pe vin avek keksoz baze lo zot swa ek bann keksoz ki zot ti a kontan vwar. An gro i ki mannyer sa rezyon pou ganny devlope e kote sa devlopman pour bann peser pou sitye dan sa konsep,» Msye François ti eksplik bann peser.

Fodre dir ki menm si Anse Royale i annan anviron en 30-enn peser komersyal ki anrezistre ti annan mwens ki lanmwatye ki ti prezan pour sa miting.

Me bann ki ti la ti fer sir ki zot ti fer zot lavwa tande e sa ti swivan en prezantasyon ki ti montre zot kote devlopman ki pe ganny propoze pou sitye.
Sa i enkli  en lasose ek slipway, fasilite twalet, bann stor, ice plant, en nouvo bazar e landrwa pour netway pwason e vann legim.

Sa bann devlopman ki pou akote bann batiman komersyal  pou sitye dan zalantour stasyon lapolis aktyel, deryer  bus stop ki al dan rezyon sid, obor ice plant aktyel e osi Labank MCB.

Vye stasyon lapolis ki en batiman istorik dan sa distrik i ekspekte ganny repare e transformen e servi pour lezot fonksyon, pou annan kyosk pour artizan e osi landrwa pour vann manze.

Vi ki Anse Royale i ganny konsidere koman dezyenm lavil, son bazar in enkorpor enpe konsep  bazar Victoria sirtou lo son kouler.

Parmi bann nouvo sizesyon ki bann peser ti fer sorti dan miting Sanmdi ti enkli propozisyon pour en breakwater pour peser pandan letan vannswet, fasilite pour tretman desarz, nesesite pour repozisyonn semen piblik e tir li dan milye sa bann devlopman, revwar kapasite sa nouvo ice plant, konsider lenerzi soley pour sa bann nouvo devlopman, nesesite pour en bon sistenm sekirite parey kamera sirveyans pour protez lekipman ek bato bann peser, nesesite pour asire ki i annan bon separasyon ant fasilite pour peser ek bato lwazir parmi lezot pwen ankor.

Tou sa bann pwen pou ganny pran an konsiderasyon avan sa konsep i  ganny finalize.
Msye François i dir ki gouvernman i anvi finaliz sa plan ver lafen sa lannen dan en fason ki bann devlopman a kapab komanse lannen prosenn.

 

 

 

» Back to Archive