Konvansyon anyel SNP |22 July 2014

SNP i fer kler son pozisyon lo lide pour en foronm nasyonal

Dan son konvansyon anyel ki ti fer sa wikenn Parti Nasyonal Sesel (Seychelles National Party - SNP) in fer kler son pozisyon lo sa foronm nasyonal ki Prezidan  James Michel ti anonse resaman ki i pe al lanse byento.

Sa parti in osi elekte en nouvo komite egzekitiv e in nonm son bann reprezantan ki pe travay o nivo sak distrik.
Sa konvansyon ki ti deroul anba tenm  ‘SNP pe delivre pour Sesel’ ti deroul dan sant konferans STC e i ti anmenn ansanm bann manm ek siporter sa parti. Osi prezan ti Msye Robert Ernesta, lider Seychelles United Party (SUP).

Letan i ti adres tou bann ki ti prezan dirizan parti SNP Msye Wavel Ramkalawan ti remersye zot tou pour zot fidelite ek lwayote.
Pour tou bann ansyen manm komite egzekitiv Msye Ramkalawan ti remersye zot pour zot travay pandan sa dernyen 3-an.

«Zot in ede gard nou parti vivan malgre tou difikilte ki nou’n pas ladan. Zot in fidel e lwayal».
Msye Ramkalawan in ganny reelekte pour en lot manda konman dirizan SNP.

An sa ki konsern partisipasyon SNP lo sa foronm nasyonal Msye Ramkalawan ti dir ki parlman i pli gran foronm akoz se dan parlman ki tou bann diverzans lide politik i ganny anmennen e avek travay serye e senser, en pei i kapab adres tou size pertinan e fer bann gran pa an-avan.

I ti dir ki SNP konman en parti politik pa’n ganny envite pour anvoy okenn manm lo sa foronm, alor SNP pa pou ganny reprezante konman en parti politik lo sa foronm malgre ki pou annan dimoun ki partaz filozofi SNP.

I ti fer resorti ki okenn dimoun ki en manm komite egzekitif SNP ki dakor pour al lo sa foronm, i fer li dan son kapasite endividyel, me non pa konman en reprezantan SNP.

SNP i respekte drwa en endividi ki santi i kapab fer en kontribisyon nasyonal pour fer li.
 
La i ti dir ki Msye Bernard Georges in ganny envite dan son kapasite konman en dimoun ki annan en gran leksperyans legal e Msye Bryan Julie in ganny swazir par LUNGOS, en lorganizasyon sosyete sivil kot i servi konman zot reprezantan drwa imen.

I ti azoute ki sa 2 dimoun lo sa foronm pou azir konman bann sitwayen prive e non pa konman reprezantan SNP.

Lo size linite nasyonal, Msye Ramkalawan i dir SNP i met lanfaz lo lefet ki i krwar ki sel fason pour nou ganny linite nasyonal e pour ki Sesel i konn vre lape, lazistis ek vre demokrasi, se pour nou pas atraver en prosesis rekonsilyasyon nasyonal.

I ti dir ki tan ki tou sa bann blesir ek soufrans ki nou pep in pas ladan pa ganny egzaminen e rekonsilyasyon i ganny prononse pour geri lepase, nou pei pa pou kapab konn vre linite ek lape.

Parmi bann rezolisyon ki ti sorti dan sa konvansyon se:
• Demann gouvernman pour enplimant rezolisyon Komisyon Elektoral konsernan reform elektoral;
• Demann gouvernman pour servi larzan drog ki’n ganny sezi ek bann trafiker pour rekonstrir sant Mont Royale;
• Demann gouvernman pour met en lafen avek security clearance;
• Demande ki bann lenstitisyon nasyonal i ganny ranforsi pour ki zot vin enparsyal parmi lezot ankor.  

Nouvo komite egzekitif parti SNP i konm swivan : Wavel Ramkalawan (Lider parti), Nicholas Préa (sekreter zeneral), Sandy Arissol ek Regina Alcindor (depite sekreter zeneral), Sianna Bistoquet (trezorye), Desheila Bastienne (depite trezorye), e bann lezot manm i Anthony Derjacques, Bernard Georges, Brian Julie, Claudette Adela, Danny Sopha, Gerald Julie, John Hoareau, Gervais Henrie, Lydia Jumeau ek Norbert Loizeau.

Bann nouvo reprezantan parti SNP ki ti ganny nonmen e prezante dan sa konvansyon i konm swivan: Anse Aux Pins – Danny Sopha;  Anse Boileau – Philip Louise; Anse Etoile – Claudette Adela; Anse Royale – Aaron Bonnelame; Au Cap – Steve Pillay; Baie Lazare – Martin Aglaé; Baie Ste Anne – Clement Gonthier; Beau Vallon – John Hoareau; Bel Air – Norbert Loizeau; Bel Ombre – Nicholas Préa; Cascade – Mayford Lozaique; English River – Gervais Henrie; Grand Anse Praslin – Francis Cupidon; Glacis – Regina Alcindor; Grand Anse Mahé – Lydia Jumeau; La Digue – Linsen Jeremie née Waye-Hive; Les Mamelles – Bernard Georges; Mont Fleuri – George Madeleine; Mont Buxton – Gerald Julie; Plaisance – Bryan Julie; Pointe Larue – Egbert Zialor; Port Glaud – Roland Sauzier; Roche Caïman – Desheila Bastienne; St Louis – Sandy Arissol; Takamaka – Vivian Morel; Perseverans – Anthony Derjacques.