Follow us on:

Facebook Twitter LinkedIn YouTube

Archive -Entertainment

2enm edisyon konpetisyon ladans kanmtole enterskoler |23 July 2014

Anse Boileau primer, segonder ek lekol Maritim gran venker

 


Bann etidyan an aksyon pandan final konpetisyon ladans kanmtole enterskoler




Lasal Teat Nasyonal ti tranble Vandredi apremidi letan ki bann gannyan 2enm edisyon konpetisyon ladans kanmtole enterskoler ti anonse.

Menm si bann manm ziri ti ganny enpe difikilte pour swazir bann gannyan, ti san gran  sirpriz ki lekol primer ek segonder Anse Boileau ti balye premye plas dan toulede kategori.

Bann siporter sorti dan sa bann lekol ti’n desann pour donn sipor zot bann danser ek dansez dan sa levennman kot bann zanfan osi byen ki bann enstrikter ek lezot ansennyan ti pe esper ek leksitasyon.

Ti annan 3 kategori ladans e dan sak, bann group ti bezwen dans trwa kalite ladans e sa ti konm swivan : primer - vals, kotis doub ek avankat ; segonder - kotis anglisan, mazok, avantrwa e pos-segonder - kotis senp, polka ek mengos mendrwat.

Apre ki tou group ti’n fini valse e fer tranble lasal, latas bann manm ziri ti komanse e sa pa ti fasil ditou akoz tou bann finalis ti determinen pour ranporte.

Me alafen pour kategori primer Anse Boileau ti sorti gan venker, La Misère ti pran 2enm plas e Grand Anse Praslin ti sorti 3enm.
Dan kategori segonder ankor Anse Boileau ti pran premye plas, tandiski Plaisance ti sorti 2enm e Mont Fleuri 3enm.

Dan kategori pos-segonder Lekol Maritim ti pran premye plas, Lekol pour Letid Biznes 2enm plas e Lekol Lar Vizyel ti bezwen kontant avek 3enm plas.
Tou group ki ti sorti premye dan sak kategori ti ganny en trofe e tou bann lezot gannyan ti resevwar en meday.

Menm si konpetisyon ti tre sere e eksitan, bann manm organizater in eksprim serten dezapwentman lo nivo partisipasyon.
 « Nou pa satisfe avek nivo partisipasyon bann lekol lo nivo eliminasyon, kantite lekol ki nou annan pa ti ganny reflekte par zot partisipasyon,» Msye Norbert Dogley ti dir.  

Fodre note ki eliminasyon ti ganny fer lo Mahé ek Praslin.
Msye Dogley i profit sa lokazyon pour ankouraz bann lekol pour form en klib ECA ki a kapab promouvwar ladans tradisyonnel.

 «Nou ti ava kontan si lannen prosenn mazorite bann lekol i vin demontre zot talan, en tel klib ECA pou garanti ki ler i annan en konpetisyon parey manrmay pou vwar ki kanmtole pa difisil e zot pou pli alez pour danse, » Msye Dogley ti fer remarke.

Msye Dogley ti osi anonse  ki lannen prosenn zot pou entrodwir en nouvo kategori dan konpetisyon e sa pou kategori romans.

«Nou bann zenn pa familye avek romans e pour anpese ki romans i disparet, nou pe entrodwir sa kategori. Lo komansman bann partisipan pou enterpret bann romans ki deza egziste me dan lavenir nou swete ki zot ava partisip avek zot bann prop konpozisyon,» i ti dir.

Antretan bann gannyan sorti lekol primer Anse Boileau ti dir ki malgre zot pa ti pe ekspekte gannyen, zot vreman fyer akoz depi Zanvye sa lannen zot pe antrennen.

Enn bann ansennyan e enstrikter ladans lo nivo segonder ki ti pe akonpanny sa bann zanfan, Marianne Amade, ti eksprim son lazwa e dir ki zot antrenn pandan poz dezennen e apre lekol.

«Bann ladans kanmtole pa ditou fasil me avek bokou repetisyon ki komans byen boner zanfan i abitye e vin alez pour danse,» i ti fer resorti.
Lo son kote Emmanuel Freminot, en lot enstrikter pour nivo primer, ti dir ki sa preparasyon ki konmans boner kot sa lekol i fer ki pour lannen prosenn deza zot annan lekip ki’n deza pare.

Fodre dir ki konpetisyon ladans kanmtole enterskoler ki en responsabilite Minister Ledikasyon depi lannen pase, in ganny dekri koman en sikse par bann organizater. Levennman ti deroul dan prezans direkter pour bann lekol primer Cyril Pillay, bann direkter ek direktris lekol, bann partisipan, paran e lezot siporter sorti dan plizyer lekol.

 

 

 

» Back to Archive