En lot loto i ganny tire dan lanmer |29 July 2014

En lot loto in ganny retire dan delo sale obor biro zournal Nasyon.

Ti yer ver 1er30 apremidi ki bann plonzer sorti kot Gard Lakot ti al rod sa loto, en Toyota AE 90 kouler blan, dan fon lanmer obor zournal Nasyon ki trouve dan kapark anfas Amusement Centre.

Plizyer dimoun ti’n vin vwar pour zot menm mannev pour retir sa loto dan delo sale. Sa travay ti al pour apepre 1 erdtan.
Met sa loto ki ti osi prezan pe obzerv sa bann deroulman, ti dir avek zournal Seychelles Nation ki son loto ti tonb dan delo sale Sanmdi swar letan i ti pe park.

«Mon pa ti santi mwan anba presyon ni per akoz en lafnet ti ouver e mon ti reisi sorti atan,», i ti dir.

Kan zournal Seychelles Nation ti demann li ki i annan lentansyon fer avek sa loto, i ti dir ki se lakonpannyen  lasirans avek ki son loto in asire ki pou determinen si zot pou ranbours li.

I pa fer premye fwa ki loto i tonb dan lanmer ober biro zournal Seychelles Nation.

I annan dimoun ki’n menm mor dan transpor ki’n tonb dan lanmer dan sa landrwa e lezot in noye apre ki zot in senpleman tonb dan lanmer dan sa menm landrwa.