Dife i pran lo landfill Providence |31 July 2014

Dife ti bril en morso landfill Providence yer.

Lazans Servis Tenny Dife ek Sovtaz ti ganny rapor dife ver 11er bomaten e Msye Jones Madeleine, zofisye relasyon piblik sa lazans, ti dir avek zournal Seychelles Nation ki zot ti deplas trwa kanmiyon ek 14 zonm pour al konbat sa dife.

I azoute ki zot ti ganny lasistans zofisye tenny dife sorti kot Lotorite Laviasyon Sivil Sesel (SCAA), e osi travayer Star ek Landscape and Waste Management Agency.

«Ti pran nou anviron 2 erdtan pour met sa dife anba kontrol e 4 erdtan pour tenny li,» Msye Madeleine ti dir zournal Seychelles Nation.

I ti osi fer resorti ki i ti pe retourn kot landfill 7er diswar yer akoz i ti’n ganny rapor ki ti annan pti letensel dife.

Msye Madeleine ti fer resorti ki i enportan pour anpes dife pran lo landfill Providence akoz i an dezord.

Nou a rapel ki an Out 2013, en pli gro dife ti pran lo landfill Providence e ti pran bann zofisye Lazans Servis Tenny Dife ek Sovtaz plizyer zour pour tenny li konpletman.

Nou portre i montre zofisye Lazans Servis Tenny Dife ek Sovtaz dan landrwa kot dife ti pe pran yer.