Ki Joseph Sinon in anmas pour nou? |02 August 2014
Demen le 3 Out Joseph Sinon ek 5 top komedyen Seselwa pou met lanbyans dan Sant Konferans Enternasyonal (ICCS) avek zot spektak ki annan pour tit ‘Lasaler dan kalorifer’.
Sa pou en komedi baze lo sitiasyon lavi toulezour tel ki dan bazar, keksoz ki pe afekte nou sosyete, parmi lezot ankor.
Sa zour pou osi annan sirpriz ki Msye Sinon in dir i pa pou kapab devwale pour le moman.
Me i ti fer remarke ki apard sa konser komedi pou osi annan one man show ek bann pti sketch pour egey lodyans.
Spektak pou deroul depi 3.30 ziska 5.30 apremidi e tiket i kout 150 roupi.
Bann komedyen ki pou akonpanny Msye Sinon i Camille Azemia (Karozen), Steve Joseph, Michael Sinon e Richie.
De plis, Msye Sinon in fer resorti ki demen pou osi annan en Charity Ball. Sa levennman pe ganny organize par bann manm komite Au Cap pour lev fon pour zanfan avek dezabilite. Alors avek led Group Tanmi, Seychelles Big 5 (Joseph Sinon, Jean-Marc Volcy, Patrick Victor, Elijah ek Sandra) an kolaborasyon avek Asian Fusion e distrik Au Cap, zot in esey fer zot mye pour fer sa aktivite vin en realite.
Sa levennman lev fon ki pou deroul depi 4er apremidi ziska 10er aswar, pou ganny fer kot Asian Fusion, Au Cap (ansyen restoran Tyfoo). Tiket pou kout 125 roupi.
Apard ki Group Tanmi ek Seychelles Big 5, pou annan osi lezot artis ki pou partisipe.
Pour toulede spektak, tiket i anvant kot Ray’s Music Room, Makki Shop (Pirates Arms) e kot National Arts Council (NAC). Tiket i osi kapab ganny aste avek Msye Joseph Sinon e i kapab ganny kontakte lo nimero telefonn 2712398.
Fodre note ki tou larzan ki ganny kolekte atraver sa Charity Ball pou al pour paran bann zanfan avek dezabilite dan distrik Au Cap.
«Vin anmize e kontribye pour en bonn koz akoz le 3 Out pou en zour inoubliab,» Msye Sinon in dir.
Alors, si nou ti a kontan apresye bann talan Seselwa ouswa siport bann zanfan avek dezabilite, randevou i demen ICCS depi 3.30 ziska 5.30 apremidi, e osi Asian Fusion, Au Cap 4er apremidi ziska 10er aswar.