SFA i fer netwayaz kot por lapes Providence |04 August 2014

Bann travayer SFA an aksyon pandan aktivite netwayaz ek lanbelisman kot por lapes Providence

Konman parti bann aktivite pour selebre son 30enm lanniverser, Lotorite Lapes Sesel (SFA) ti organiz en aktivite netwayaz ek lanbelisman kot por lapes Providence Vandredi.

Bi prensipal sa netwayaz ti pour SFA netway sa far ki ganny trouve kot sa baraz ki protez sa por.

“Nou anploy en kontrakter pour fer netwayaz la kot sa far. Me la ozordi nou’n deside fer li konman en aktivite ekstra pour mark nou 30enm lanniverser,» sef egzekitif SFA Finley Racombo ti dir avek zournal Seychelles Nation.

Apard koup zerb ek koupayaz, bann travayer SFA ti osi plant bann feyaz ek palm kot por.

“Sa aktivite i enn parmi bann lezot aktivite ki nou pe organize pour nou selebrasyon 30-an legzistans. Nou pe anvizaze organiz en legzibisyon ki pou demontre listwar SFA, son evolisyon e devlopman sekter lapes pandan sa dernyen 30-an,» Msye Raccombo ti azoute.

I ti osi profite pour koz enpe lo devlopman sekter lapes dan pei.

“Parey nou konnen pei pe devlop sitan vit e sekter lapes osi pe fer son par. Nou kot SFA, nou pe enplimant bann diferan stratezi ki pe adapte ek sa bann sanzman e devlopman. Nou osi fer fas avek bann defi e nou pe travay lo bann plan ki ava ed nou sirmont sa bann defi.»

Enn sa bann defi i konsern masin ki fer laglas (ice plant).

«An se moman nou annan nou senk ice plant – enn lo Praslin e kat lo Mahe; antou zot prodwi 33 tonn laglas. Nou konnen ki sa pa sifizan pour lakantite bato nou annan ki bezwen laglas. Sa i konpri bato artizanal, semi endistriyel e bann endistriyel. Nou pe ganny ankor de ki pour azout avek bann ki nou deza annan e nou pou plas enn isi Providence e lot Praslin,» Msye Racombo ti eksplike.

Msye Racombo ti profite pour anonse ki zot osi pe anvizaze fer louvertir ofisyel Processing Plant dernyen semenn Out.