PMC i sansibiliz zabitan dan bann flat lo proteksyon zot labita |06 August 2014

Bann travayer lakonpannyen ki zer batiman, lakaz ek lezot propriete gouvernman, ‘Property Management Corporation’ oubyen PMC, i souvan santi zot oblize pour sorti dan zot biro pour al netway ou penn bann flat ki gouvernman in met a dispozisyon bann zabitan.

Sa i akoz souvan bann lokater pa pran zot responsabilite e zot sali landrwa, sirtou bann fasilite komen ki bann fanmiy i partaze ant kanmarad. Sa i enkli zarden, larantre, leskalye, eksetera.

PMC i dir ki i’n resaman annan en logmantasyon dan bann ka labi ek degradasyon lo son bann fasilite ek lenfrastriktir.

Enn bann landrwa ki konsernen avek sa problenm se Zil Perseverance. Se pour sa rezon ki bann travayer PMC ti mobilize Sanmdi pase pour netway e penn en group flat dan Vilaz Perseverans 1.

Sa travay ki ti osi annan pour bi sansibiliz dimoun lo nesesite pour pran ka avek zot labita ek lanvironnman, ti ganny fer avek kolaborasyon ladministrasyon distrik ek bann zabitan, sirtou bann zanfan.

Sef egzekitif sa lakonpannyen, Msye Timothe Sinon, in deplor labsans bann adilt dan sa aktivite, sirtou bann zonm.
«I enportan ki paran i vin pli konsansye e pran zot responsabilite pour donn legzanp zot zanfan pour ki nou kapab devlop en kiltir kot nou pran swen e mentenir nou landrwa,» Msye Sinon ti dir.

Dan sa lespri, PMC pe kontinyelman lans en lapel a bann rezidan dan bann flat pour ede mentenir e prezerv bann fasilite.
Bann portre ki akonpanny lartik i montre bann travayer PMC ek serten zabitan panda aktivite Sanmdi pour netway e penn en group flat dan Vilaz Perseverans 1.