Follow us on:

Facebook Twitter LinkedIn YouTube

Archive -Seychelles

Santer ek mizisyen i eksprim zot konsern |22 August 2014

Apre bann pent ek operater teat sa de dernyen Merkredi, ti tour bann mizisyen ek santer pour zwenn avek sef egzekitif Konsey Nasyonal pour Lar (Nac) Jimmy Savy ek son staf, dan en seri rankont konsiltativ ki sa konsey pe fer avek bann artis.

Rankont sa semenn ti fer kot Lotel Coral Strand Beau Vallon e bann artis ki ti prezan ti Ralph, Joseph Sinon, Michelle Marengo, Ion Kid, Telcy, Jany, Jean-Marc Volcy, Patrick Victor, Basil Bouchereau e Regis Philoe.

Bann konsern zeneral ki sa bann artis ti fer resorti i enkli en mank landrwa apropriye pour vann zot CD, mank kouvertir medyatik pour zot bann aktivite, mank standar dan prodiksyon lanmizik e en mank perse lo lasenn enternasyonal.

Bann santer ek mizisyen ti osi fer remarke ki lalwa pa vann bwar apre 9er diswar i redwir lakantite dimoun ki zot atire kot zot bann spektak. Solisyon ki ti propoze pour sa se konstriksyon en landrwa spektak apopriye pour artis ensi ki piblik.

Msye Savy ti fer remarke ki i neseser ki Minister Kiltir i akseler sa proze ‘Arts Village’ ki a donn artis en lasenn kot zot a kapab eksprim zot.

En lot konsern se sitiasyon kot parey zot menm zot dir « mizisyen pe fini ». Sa se akoz i annan mwens zenn ki aprann zwe lanmizik e bokou i aprezan fer lanmizik lo konpiter e menm vol lanmizik lezot.
 
Bann benn pe osi disparet. Zot santi ki tou sa i en menas pour lanmizik e ki byento pou napa relev kan bann mizisyen ki ankor vivan i ale.

Bann santer ek mizisyen in fer remarke ki sa i en sitiasyon enkyetan akoz i non selman reflekte en problenm mizikal, me en problenm idantiter kot nou lidantite limenm i menase.

Anmenmtan, zot ti fer remarke ki radyo ek televizyon i promot sa bann “fo artis” e bann “medyokrite”.

“Radyo in vin en danze pour lar,” en santer ti fer remarke.

Dan en fason zeneral, bann santer ek mizisyen i santi ki i annan en mank respe pour bannn artis dan lasosyete, kot i annan en mank konsiderasyon pour rol ki zot zwe dan lekonomi pei.

Koman solisyon a zot bann problenm bann artis in propoz plis lenvestisman dan lar, en progranm ledikasyon kiltirel dan lekol, en konservatwar lanmizik pli efikas, plis kouvertir medyatik e meyer kalite progranm artistik lo televizyon.

Koman en dernyen resor, serten artis in menm propoz en miting avek Prezidan Larepiblik.

Menm si zot dakor ki i osi enportan pour plis santer e mizisyen pran zot lar koman en karyer plito ki koman en pastan, bann artis in sepandan fer remarke ki sa i pa toultan fasil akoz napa vokasyon artistik kot bann zenn i anvi vin artis. Dapre zot, sa i san dout akoz i pa fasil pour viv koman en artis profesyonnel.

Malgre tou, konklizyon se ki i annan travay e lavi dan lanmizik si parey en artis ti dir « nou organiz nou e nou met lord dan nou lakaz ».

Koman en premye pa, i annan en propozisyon pour fer en Marse Lanmizik Seselwa toulezan, avek partisipasyon bann prodikter enternasyonal. Fodre osi ki bann artis Seselwa i ganny sans partisip dan bann gran levennman enternasyonal.

Anmenmtan, zot dakor ki zot osi bezwen prepar zot anterm zestyon artistik pour zot kapab reponn a bann defi lo nivo enternasyonal.

Alafen rankont, bann artis ti eksprim zot lapresiasyon pour ganny sans eksprim zot. Sepandan, zot in konplent ki zot pa sifizaman ganny konsilte. Par egzanp, zot santi ki personn pa’n rod zot lopinyon lo desizyon pour ranplas Nac par Cinea (Creative Industries and National Events Industry). Me zot kwar ki i pa ankor tro tar pour minister kiltir ekout zot lapel.

» Back to Archive