Ledikasyon zonm konman bann per-d-fanmir |23 August 2014

Kiltir Seselwa ti regard en per-d-fanmir konman sa enn ki anmenn manze oubyen larzan kot lakour. Sa ti zot responsabilite prensipal e en bon mari ti sa enn ki egzers sa rol par ekselans.  

Alors lafanmir ti edik bann zenn garson pour fer bann travay deor oubyen serten travay ki zot ti apel louvraz garson, par egzanp: grat pwason, balye deor.
 
E plis ankor pa ti dezoner pour en paran les son garson al sa ki nou dir marsaye.  Parkont bann zenn fiy ti ganny en ledikasyon domestik e zot ti ganny pli proteze e veye, ki fer zot in pli byen ekipe pour pran an sarz en fanmir.  Sa i en pratik ki pa’n neseserman ed zonm nou lepok e i enn parmi plizyer fakter ki responsab pour ki zonm dan sosyete konmela pa pare pour pran bann komitman ou responsabilite ki lasosyete modern i ekspekte de zot.

Dan son let pour lafanmir Lepap Paul VI ti refer lafanmir konman Sivilizasyon Lanmour kot sivilizasyon i an etrwat relasyon avek kiltir.  Zonm dan lafanmir denozour i merit ki zot pratik en kiltir lanmour, kot rol zonm i al pli lwen ki zis nouri lafanmir avek dipen. Dan sa let, Lepap ti ekri ki en fwaye ki pratik en kiltir lanmour se en fanmir kretyen.  

En lot lobzervasyon ki'n rezonnen se ki mannyer partisipasyon nou bann zonm dan legliz e dan bann mouvman sosyete sivil in redwir drastikman konpare avek lontan. Denozour, nou vwar ki se bann fanm ki pe pran bann rol e responsabilite dan plas bann zonm.  Donk si nou dir ki ledikasyon i konmans dan lakour, alors i vre pour dir ki sa metod elve nou zanfan ki fer ki ozordi bann fanm i pli responsab ki bann zonm.

Sa se bann rezon ki legliz an kolaborasyon avek Lasosiasyon pour Promosyon Fanmir Solid in deside pran en progranm pour ledikasyon nou bann zonm.  

Se la ki Group Ros Vivan ti ganny fonde isi menm pour zwe sa rol. Sa group zonm i krwar ki tou sa ki lasosyete i ekspekte de zonm i deza bann dezir e swe ki bokou zonm i partaze,  me nou devret admet ki i annan bokou lobstak.  En legzanp se bann madanm ki'n perdi konfyans dan zonm e zot pa vreman eksite pour sed zot plas pour bann zonm. Sa mank konfyans in osi antre dan bann zonm ki pa krwar zot kapab fer keksoz lo zot menm.

Alors en mo pour sa bann ki pe viv dan lesperans, zot devret pran kouraz e reganny konfyans e sirtou rann lapel bann groupman ki pe ganny formen pour ki bann panse negatif lo zonm i sanze e pli enportan ki bann zonm i santi zot alez pour aprose e pran linisyativ dan nenport ki kous lasosyete.

Travay i komans la, leve zonm e pran zot plas dan Sivilizasyon Lanmour.

En kontribisyon group Ros Vivan