Sesel i selebre lazournen latizann tradisyonnel Afriken |30 August 2014

Ti atraver divers aktivite ki lazournen latizann tradisyonnel Afriken ti ganny komemore La Bastille yer.

Sa bann aktivite ti’n ganny organize par seksyon resers leritaz nasyonal dan Minister Tourizm ek Kilitir.

Le 31 Out i ganny dedye enternasyonalman konman Lazournen Latizann Tradisyonnel Afiken. Sa lazournen i ganny servi konman en lazournen pour selebre legzistans sa tradisyon e osi fer resorti son lenportans.

Sa lannen bann aktivite in organize anba tenm ‘Rityel latizann tradisyonnel e son pratik Seselwa’ (Medicinal rituals and practices of Seychelles) pour ogmant konnesans bann dimoun, sirtou bann zanfan, lo bann fason e kimannyer bann latizann tradisyonnel ti ganny donnen.

Bann aktivite ti konpri legzibisyon kot bann viziter ti kapab aprann plis lo bann fason ki bann granmoun lontan ti fer pour fer fas avek bann maladi.

Par egzanp, manm piblik ti aprann ki bann pti baba ti ganny bennyen dan delo soley pour zot kapab ganny lenerzi.

Ti osi annan lavant liv e bann prodwi latizann tradisyonnel, tel ki bann efizyon ki ti’n fini prepare e bann plant medisinal.

Parmi bann ki ti la pour partaz zot konnesans ti Msye Jamie Dogley e Jean-Joseph Madeleine ki ti fer bann diferan demonstrasyon e donn bann leksplikasyon detaye.

Msye Madeleine ti fer en demonstrasyon lo ki fason bann dimoun ti retir lay (zensek) ki ti’n tonm dan lizye e i ti osi fer en demonstrasyon retir foulir dan lipye.

Msye Dogley ti eksplik bann fason ek metod ki bann granmoun ti rekiper bann dimoun ki ti dan lafyev.

I osi annan en lartik dan zournal Seychelles Nation ozordi avek tit Doctor Nature, ki koz en pe lo bann latizann tradisyonnel.

Bann portre ki akonpanny lartik i montre enpe bann aktivite ki ti ganny organize yer pour mark lazournen latizann tradisyonnel Afriken.