Kominike lapolis |13 September 2014

Lapolis in raporte ki en zonm aze 47-an ki reste Le Niol i admit dan ‘Doffay Ward’ kot Lopital Sesel apre ki i ti ganny atake e morde par 3 lisyen.
Sa lensidan ti ariv Sorento, Glacis.

 Kondisyon sa zonm ki’n sibir plizyer blesir lo diferan parti son lekor in ganny dekri koman stab.

Dapre rapor sete 1 Cane Corso ek 2 Pitbull ki ti atake e fer dimal serye sa zonm ki ti bezwen al dan lasal loperasyon.

Sa lensidan ti ganny raporte ver 4er39 yer granmaten e ti ariv lo semen piblik Sorento, Glacis letan ki sa zonm ti pe desann pour al travay.

Dapre rapor, sa 3 lisyen ti sorti dan en baro ouver lo en propriete prive pour atake e mord zot viktim. Touzour  dapre rapor, proprieter sa landrwa ti absan letan sa lensidan ti arive.

 Pandan ki lapolis i fer lanket dan sa ka, i pe anmenmtan ankor enn fwa lans lapel avek piblik an zeneral pour pran tou mezir neseser pour asire ki lensidan parey pa repete