Kominike lapolis |16 September 2014

Lapolis in raporte ki anviron 4er15 yer apremidi en aksidan ki ti’n arrive kot ansyen stasyon radyo FEBA ti ganny raporte avek zot.
An rezilta sa aksidan, en zonm 21-an ki reste Perseverance, en lot zonm 24-an ki reste La Misère ek en madanm aze 26-an ki reste La Gogue ti ganny transporte kot Sant Dirzans, Lopital Sesel.

Dapre lenformasyon sa zonm 24-an ti pe  dray sorti dan direksyon Anse Etoile pour al ver Victoria akonpannyen par sa madanm 26-an. Sa zonm 21-an li i ti pe dray dan direksyon opoze. Ler zot ti ariv kot ansyen FEBA, sa de loto ti fer kolizyon.

Avek lasistans lanbilans, sa 3 dimoun ti ganny transporte kot Sant Dirzans. Sa drayver 21-an ti resevwar tretman pour pti blesir e plitar ganny large tandi ki sa lot drayver 24-an ki ti’n al pas dan ‘CT Scan’ li i bezwen re al pas ankor dan ‘scan’ apre ki i pe konplent douler dan likou. Sa madanm in ganny krose lo son lebra kote drwat.

Lapolis in detenir sa zonm 21-an apre ki tes lalkol fer lo li i montre ki nivo lalkol dan son lekor ti par lao limit ki ganny preskri par lalwa. En lanket in ganny ouver dan sa aksidan.