Gouvernman i fermeman angaze dan lalit kont koripsyon |17 September 2014
Gouvernman pe servi tou mezir an plas pou konbat kont koripsyon dan Seychelles.
Se Minis pour Finans, Komers ek Lenvestisman, Msye Pierre Laporte ki ti devwal sa letan i ti pe reponn kestyon dan Lasanble Nasyonal yer bomaten.
Swivan en kestyon poze par manm elekte pour distrik Cascade Onorab Charles Decommarmond, Minis Laporte ti dir ki gouvernman i deplor koripson dan Seychelles.
I ti dir ki koripsyon i en konsern nasyonal e lalit kont sa fleo i demann zefor tou endividi e group dan sosyete enkli lasosyete sivil ek gouvernman. Minis ti donn lasirans ki i deza annan lalwa neseser e diferan form e nivo odit ki permet konbat koripsyon e osi blansisaz larzan. Anba sa bann lalwa, Minister Finans in adres plis ki en douzenn ka serye depi 2012.
Dan serten ka aksyon in deza ganny pran e lezot i dan lanmen lapolis. Sa i eksklir kanmenm bann ka ki’n detekte dan lezot lazans. Minis in azoute ki son minister in osi pran lezot mezir ki enkli sanz fonksyon serten travayer ouswa en restriktirasyon konplet serten servis.
Swivan en kestyon siplemanter par Sef Lopozisyon Onorab David Pierre, Minis responsab pour Finans ti dir ki Minister Zafer Etranzer i devret travay pour asire ki Seychelles i ganny en pli bon zimaz lo nivo enternasyonal akoz i an se moman ganny konsidere konman en pei kot i annan en ase o nivo koripsyon. Annefe, Seychelles i klase 47enm dan 177 pei lo Lendeks Transparency International.
Minis Laporte ti osi demann Lasanble pour propoz okenn lalwa ki i krwar i neseser pour redwir nivo koripsyon dan pei.
Dan Lasanble yer, Minis Finans ti osi donn lasirans ki gouvernman pou fer tou son posib pour ki bann aki reform ekonomik i vin ireversib. Letan i ti reponn en kestyon manm elekte pour Pointe Larue Onorab Jennifer Vel, i ti azoute ki pour fer sa posib gouvernman pou kontinyen travay avek led ek lekspertiz Labank Mondyal ek Fon Moneter Enternasyonal pour adres bann defayans ki kapab egziste.
Minis ti egalman koz lo bann diferan lavantaz ki Seychelles pou gannyen ler i vin 160enm manm Lorganizasyon Komers Enternasyonal (WTO) byento.
I ti dir ki menm si nou pa ekspekte gran sanzman, pou kanmenm annan amelyorasyon dan bann striktir ek letablisman e sa pou anmenn en lefe pozitiv lon term lo nou lekonomi. Dan ka posibilite okenn konsekans advers, i ti asire ki gouvernman i annan letan pour prepar li pour sa evantyalite. I ti azoute ki konman en manm WTO, Seychelles pou bezwen ouver lezot sekter lekonomi tel ki sekter odyovizyel e rann zot pli liberal.
Lo en kestyon lye a lodyovizyel zisteman, Minis Laporte ti anonse ki gouvernman pe reflesir lo konman pour revwar servis telekominikasyon dan son totalite e pran aksyon avek bann lakonpannyen ki pa donn en servis satisfezan.
Sa i vin apre konsta ki serten sa bann operater pa pe respekte zot langazman e pe donn en move servis piblik. I ti enform bann konsomater ki dan ka kot zot pa satisfe avek servis, zot kapab fer en konplent avek Komisyon Komers Lib oubyen Fair Trading Commission (FTC).
Minis ti enform Lasanble ki resaman preski 100 konplent in ganny remedye par mediasyon ant lakonpannyen ek kliyan. An rezilta, sa lakonpannyen i bezwen eksplik lakoz sa move servis, amelyor li ou menm pey konpasasyon son kliyan.
Minis responsab pour Komers ti oule asir piblik ki lalwa neseser ki kontrol sa sekter i deza egziste, me ki bann lotorite parey SLA (Seychelles Licensing Authority) ek Departman Lenformasyon Kominikasyon e Teknolozi (DICT) i devret fer plis swivi e pran plis aksyon pour ki lalwa i ganny enplimante.