Gouvernman pe kontinyelman amelyor prosedir lòn pour pti biznes |19 September 2014

Menm si ‘SME Scheme’ (Small and Medium Enterprise Scheme) – sa progranm ki permet bann pti biznes benefisye avek en lòn ek bann kondisyon favorab – pe mars byen ziska prezan, gouvernman pe kontinyelman revwar e amelyor prosedir pour fer li vin pli enteresan pour pti biznes.

Se Minis pour Finans, Komers ek Lenvestisman Msye Pierre Laporte ki ti dir sa dan Lasanble Nasyonal mardi.

Letan i ti pe reponn en kestyon poze par manm elekte pour Rivière Anglaise Onorab Kevin Vidot, Minis Laporte ti dir ki dan sa de dernyen lannen gouvernman in fer bokou pour siport bann pti biznes, avek 100 milyon roupi ki ganny peye par an dan form lòn. Sa in permet plis finansman dan domenn lagrikiltir, lapes ek lenerzi renouvlab. I ti azoute ki in osi annan kreasyon Departman Antreprenarya ek Inovasyon (Entrepreneurship and Innovation) non selman pour devlop plis pti biznes me osi pour donn zot en kiltir inovasyon.

Minis ti osi azoute ki gouvernman ek bann labank komersyal in deza fer serten reazisteman o fir e a mezir ki sa skim in devlope. Sa in osi aplik lo lezot lòn e bann kondisyon in souvan baze lo bann norm enternasyonal. I ti donn lasirans ki son minister pe kontinyelman travay an partenarya avek labank komersyal pour rann bann prosedir aplikasyon lòn pli fasil e pour ki bann lòn i vin pli enteresan.

Par egzanp, peryod gras pour bann pti biznes in prolonze pour vin sis mwan aprezan e kliyan i kapab demande pour pa pey lentere pandan sa letan. Prosedir lanrezistreman biznes kot Rezistrar in osi vin pli fasil.

Minis Finans ti sepandan fer remarke ki sa bann partenarya pa toultan fasil, sirtou avek avek bann labank enternasyonal ki bezwen respekte zot bann prensip. Par egzanp, Minis i krwar ki kontribisyon personnel ki serten labank i demande i tro bokou. Malgre sa, i ti azoute ki menm si zot in kontinyelman ganny kritike pour pa ed lekonomi, bann labank in fer en gro zefor dan ‘SME Scheme’.

Minis ti ilistre sikse sa skim par lefe ki ziska prezan napa okenn ka kot bann kliyan pa’n kapab repey zot lòn e ki serten i menm konmans peye avan ki peryod gras i ekspire. Parkont, i ti fer remarke ki parfwa i annan defayans dan preparasyon plan biznes ki en letap tre enportan pour en antreprener. I ti dir ki bann minister parey Resours Natirel i devret swiv legzanp Senpa pour donn sa lasistans e osi formasyon avan ki en kliyan i pran son lòn. Sekter prive pe osi ganny ankouraze pour entervenir dan sa domenn.

Dan ka kot SBFA (Small Business Financial Agency) i parfwa tarde pour deblok larzan, Minis Laporte ti eksplike ki sa i akoz serten kliyan i an retar avek zot repeyman, ki fer ki parfwa napa ase larzan pour donn lezot dimoun. In promet pour met an plas en mekanizm pour evit sa alavenir. In osi promet  en lespas pour bann pti biznes ki pou kree Providence byento.