Wi, Kassav pou la pour Festival Kreol 2014 ! |22 September 2014

Minis pour Tourizm e Kiltir Msye Alain St Ange in konfirmen ki group mizikal Kreol Kassav pou perform pandan 29enm Festival Kreol.

Minis St Ange ti konfirm sa dan en konferans lapres ki ti fer dan son lofis tar semenn pase dan prezans en reprezantan Kassav,  Msye Harowna Rose , Sef Ekzetif Konsey Nasyonal pour Lar (NAC) Msye Jimmy Savy ek bann manm lapres lokal.

«Mon minister ansanm avek NAC, Departman Kiltir apre ki nou’n ekout bann leko ek reaksyon pep Seselwa nou’n vwar li neseser ki nou pa zis dir nou kontan kreolite me ki nou demontre ki nou kontan nou kreolite dan sa mwan Oktob ki mwan Kreol. Sa lannen Departman Kiltir ek NAC pe travay for pour relans Festival Kreol,» Minis St Ange ti dir.

«Nou’n deza konmanse lannen pase e sa lannen nou’n deside pour al pli lwen par envit Kassav pour vin partisip avek nou dan nou festival. E mon annan plezir pour dir ki zot pou prezan dan louvertir ofisyel apre zot pou fer en gran spektak popiler kot bann fàn ek bann Seselwa an zeneral ek lezot dimoun ava kapab apresye,» Minis ti azoute.

I bon note ki Kassav i en group ki reprezant lanmizik Kreol dan lemonn antye e zot ti selebre 35-an zot legzistans lannen pase e zot deza lo en tour kot zot pe fer bann spektak atraver lemon.

Msye Harowna Rose ti dir ki Kassav pou enteronp zot bann spektak atraver lemonn zis pour zot kapab vin pran par e partaz zot kreolite dan Festival Kreol 2014.

«Ti vreman difisil pour nou kapab organiz sa deplasman ki pou ede fer Seselwa anmize e apresye zot kreolite, vi ki sa group i vreman okipe,» Msye Rose ti dir.

«Nou swete ki Seselwa i apresye e ki zot vin an gran nonm pour sa spektak e ki nou tou san regard nou nasyonalite nou ava kapab selebre nou kreolite. Mon asire ki dernyen fwa ki Kassav ti vini an 1991 ki bokou ti apresye e pour bann ki pa ti ankor ne oubyen ti ankor en pti zanfan parey mwan mon asire ki zot paran a rakont zot e ki i ti ava meyer ki zot vin eksperyans group Kassav pour zot menm,» Msye Harowna Rose ti azoute.

Minis St Ange ti profite pour remersye Msye Rose pour son sipor ek travay, e i ti  osi remersye tou bann ki pe ede dan en fason ou en lot pour ki sa enn Festival Kreol 2014 i deroul dan en gran lanpler. «Mon oule azoute ki benn Kassav pa pe pran okenn lapey pour vin perform pour sa enn Festival Kreol me mon minister avek led nou bann partener fidel pe pran responsabilite pour depans tiket avyon bann manm sa group,» Minis St Ange ti azoute.

Zour e lye spektak pa ankor finalize me tiket ki deza anvant i kout 200 roupi.