Ekriven Seselwa i pofin zot teknik dan en latelye |22 September 2014

En group en kenzenn ekriven ti zwenn pour en latelye literer en zournen kot Lenstiti Kreol Au Cap semenn pase.
Lobzektif sete pour pofin zot konnesans ek zot teknik dan diferan zanr literer, partikilyerman dan lekritir roman ek zistwar kourt.

Direktris Lenstiti Kreol Madanm Penda Choppy in eksplike ki bi sa latelye sete pour ki bann ekriven i fer diferans sirtou ant zistwar kourt ek roman.

«Atraver konkour Pri Antoine Abel ki Lenstiti Kreol i organize tou le 2-an,  nou’n konstate ki i parfwa annan melanz ou konfizyon ant plizyer zanr ou kategori e ziri i oblize rezet serten travay akoz bann kriter pa’n ganny respekte. Sa i sirtou dan ka zistwar kourt ek roman. Lannen pase ziri ti bezwen kre en kategori mini roman pour kapab entegre serten maniskri,» Madanm Choppy ti dir.

I ti dekri sa rankont konman en bon linisyativ pour bann ekriven konfirmen amelyor zot lekritir e osi pour bann ki pa ankor pibliy okenn travay konnen koman pour demare.

Latelye ti dirize par profeser literatir eksperyanse Mohamed Lamine Kante ki ti konfirm konsta Madanm Choppy ki Lenstiti Kreol pa’n konstat gran problenm dan poezi prodwir par bann poet Seselwa.

«Tou Seselwa i en poet e tou dimoun i kapab ekrir akoz lapoezi i ine dan nou langaz. Lapoezi i lanmizik bann mo. Tou Seselwa i swa kapab zwe lanmizik ou kapab sante,» Msye Kante ti dir.

Me, sa profeser literatir ti ensiste ki nou bezwen konnen konman pour ekrir e ki fodre kapab idantifye en size pour ekri lo la. Se san dout sa ki nou apel lenspirasyon.

I ti osi soulinny sa ki in apel «reyonnman enkontestab kiltir Kreol, non selman dan Losean Endyen me osi dan Karaib».

I ti azoute ki pour ki kiltir Kreol an zeneral ek literatir Kreol an partikilye i kontinyen devlope, i neseser annan bann rankont regilye ant bann ekriven ek bann formater.

Pandan za zournen travay bann ekriven ti aprann ki pour zot kapab ekrir fodre zot premyerman kapab e kontan lir. Sa i pa vedir ki fodre zot kopye lo lezot travay, me parey nou dir dan literatir «tou teks i sorti dan en lot teks». Zot ti osi dekouver ki zot kapab ekri en teks aparti nenport mo ki zot kapab zwe avek dan diferan fason.

Latelye ti egalman deroul dan en fason pratik kot bann ekriven ti ekrir diferan teks baze lo bann lobze e zimaz otour zot e osi lo lezot sitiasyon ki ti kapab enspir zot.