Zenn i plant pye dibwa kot Lekol Perseverance |22 September 2014

Labitid bann manm Lasanble Lazenes i rasanble kot National House dan Sanmdi bomaten pour zot bann deliberasyon, me Sanmdi pase sa bann zenn ti zwenn ansanm kot lekol Perseverance primer pour zot akonpli en lot aktivite.

Sa i en aktivite ki zot ti’n organize pour komemor lazournen sanzman klima ki ti selebre le 20 Septanm.

Malgre lapli ki ti pe tonbe sa pa ti anpes sa bann zenn desann e fer zot kontribisyon pour zot esey kontbat lefe ki sanzman klima pe anmennen.

Zot azanda pour sa lazournen ti konmans avek en prezantasyon ki ti ganny fer par Spiker Lasanble Lazenes, Manmzel Angelic Pouponeau, e osi Anaelle Bodwell en ansyenn manm sa lasanble. Sa bann prezantasyon ti ede agrandir nosyon bann manm lo kisisa sanzman klima e zot ti koz osi lo ban pti leta zil.

Bann zenn ti vreman eksite pour plant bann pti pye dibwa dan lakour lekol Perseverance primer. Zot ti’n resevwar sa bann plant avek Zarden Botanik pour ed zot fer zot kontribisyon anver sanzman klima.