Lenportans resevwar en resi! |29 September 2014

Dan bokou pei en boutikye oubyen bann dimoun ki ofer en servis i merit fer li zot responsabilite pour prodwir en resi apre sak tranzaksyon. Sesel pa en leksepsyon. Sa i kapab ganny fer apre ki en konsonmater in aste en prodwi oubyen apre ki en servis in ganny ofer. Me dan lot kote, i annan serten tranzaksyon ki serten sonm pa pou ganny enkli lo sa resi. Sa i legzanp bann peyman adisyonnel parey ‘tips’ an plis ki total lo resi ki ganny ofer par bann kliyan dan lotel oubyen restoran.

Seksyon 25, anba lalwa pour Proteksyon Konsonmater 2010 i fer provizyon pour ki en boutikye oubyen en dimoun ki pe ofer en servis i merit prodwir en resi an ekri a sak fwa ki en konsonmater i fer en tranzaksyon. Tou konsonmater i annan drwa ganny en resi pour prouve ki en prodwi partikilye in ganny aste ouswa en servis spesifik in ganny ofer.

En resi i merit ganny prodwr menm pour en prodwi oubyen en servis ki’n ganny resevwar dan en sirkonstans enformel. Legzanp: dan leka ki en zanmi i fer reparasyon lo en lekipman dan ou lakaz, ler peyman i ganny fer, en resi i merit ganny donnen.

Lo en resi ki’n ganny donnen, apre ki en prodwi in ganny aste ouswa apre en servis ki’n ganny ofer i merit annan bann lenformasyon neseser tel ki; non ek ladres sa landrwa kot peyman in ganny fer; ladres sa biznes kot sa prodwi in ganny aste oubyen kot sa servis in ganny ofer; dat sa tranzaksyon; deskripsyon sa bann prodwi oubyen sa servis ki’n ganny ofer; pri pour en prodwi oubyen en servis endividyel; lakantite prodwi oubyen servis ki en konsonmater in peye; pri avan e apre ki taks in ganny aplike; poursantaz taks ki’n ganny aplike e pri total sa tranzaksyon enkli nenport taks aplikab.

Lenportans en resi i laprev en peyman ki’n ganny fer pour en prodwi ki’n ganny aste oubyen en servis ki’n ganny ofer e i kapab osi etabli en peryod garanti.
Dan ka ki en dimoun i oule depoz en konplent kont en prodwi ki pa bon ouswa en servis ki pa lo standar, son resi i levidans sa tranzaksyon.
I touzour enportan ki ou gard ou resi apre sak tranzaksyon e ki ou osi demann en resi dan ka ki ou pa ganny ofer enn.

En kontribisyon Komisyon pour Komers Zis (FTC)