Lanmes spesyal pour lasemenn tourizm |29 September 2014

Parmi bokou aktivite ki’n ganny organize pour selebre Lasemenn Tourizm i en lanmes ki ti ganny selebre yer kot Legliz Sainte Thérèse, Plaisance.

Menm si ti annan lapli sa pa ti anpes bann krwayan pour desann e vin asiste lanmes ki ti ganny selebre par Per Pierre Madiela ki Viker Legliz Sainte Thérèse.
 
Parmi bann krwayan ki ti asiste sa lanmes spesyal ti Minis pour Tourizm ek Kiltir, Msye Alain St Ange, Sef Egzekitif Bord Tourizm Sesel (STB), Manmzel Sherin Naiken, Direkter Lakademi Tourizm Sesel, Msye Flavien Joubert e plizyer zofisye STB.

Lanmes ti ganny animen par ‘Pastorale des enfants’ e ‘Hommes Vaillants de St Thérèse’ e bann zofisye STB ti partisip dan servis pour lir e anmenn lofrann.

Parmi bann lezot aktivite ki’n ganny organize pour Lasemenn Tourizm i donasyon, bann port ouver kot serten lotel, Bazar Labrin spesyal e lezot ankor.

Nou portre i montre Per Pierre Madiela pe anim lanmes.