Follow us on:

Facebook Twitter LinkedIn YouTube

Archive -Seychelles

Gannyan ‘History Fair 2014’ i resevwar zot pri |30 September 2014

Lekol La Rosière primer ek La Digue segonder i gran gannyan ‘History Fair 2014’ dan zot kategori respektiv.
Dan kategori ‘Open’, se Msye Eric Atulo et Madanm Lilia Nibourette, touzour sorti La Digue, ki ti sorti venker.

Sa konpetisyon, organize par Arsiv Nasyonal, ti deroul anba tenm ‘Leritaz en Kominote’, e ti vwar partisipasyon 8 lekol atraver Sesel e plizyer endividi.

Letan i ti pe koz kot seremoni prezantasyon pri avek bann gannyan, direkter Arsiv Nasyonal Alain Lucas ti dir ki ‘History Fair’, ki ganny organize tou le de-z-an, i reini bann lekol ensi ki bann endividi ki annan en lentere dan listwar nou pei e permet zot agrandi zot konnesans dan nou leritaz kiltirel.

‘History Fair’ sa lannen in osi atir latansyon bann koleg dan lezot zil Losean Endyen e Sesel i oule anmenn sa aktivite pli lwen dan la rezyon.

Sekreter prensipal pour Kiltir, Benjamin Rose, ti dir ki ‘History Fair’ i ganny organize avek bi met an valer nou listwar, leritaz ek tradisyon dan form dokimantasyon.

Sa lannen i fer trwazyenm fwa ki sa konpetisyon i ganny organize e bokou partisipan in swazir pour fer proze lo zot lekol, zot distrik, e osi lo bann sit istorik.

I annan lekol ki’n fer plis ki en proze e i osi annan ki ti partisip pour premye fwa.
Rezilta sa konpetisyon i konm swivan :

Lo nivo primer, Lekol La Rosière in ranport premye pri avek en proze lo zot lekol, tandis ki Lekol Beau Vallon in ranport dezyenm pri avek zot proze lo Simityer Sullivan e Lekol Cascade in ranport trwazyenm pri avek zot proze lo zot lekol.

Dan kategori segonder, Lekol La Digue in sorti venker avek zot proze  lo  lekonomi La Digue ek son bann lakaz  tradisyonnel. Dan dezyenm plas ti Lekol Independent avek en proze lo simityer Bel Air tandis ki trwazyenm pozisyon ti al ankor pour Lekol La Digue avek en proze lo ladans tradisyonnel Madilo.

Dan kategori ‘Open’, Msye Eric Atulo ek Madanm Lilia Nibourette in ranport premye pri  avek zot proze lo bann lendistri tradisyonnel lo La Digue, Manmzel Kerris Lucas in ranport dezyenm pri avek en proze lo La Plaine Saint André e Madanm Lymia Bibi li in ranport trwazyenm pri avek en proze lo bann ansennyan lakres.

» Back to Archive