Lasanble i aprouv bidze siplemanter pour en sonm 224.193 milyon roupi |01 October 2014
Lasanble Nasyonal in aprouv en bidze siplemanter pour en sonm 224.193 milyon roupi pandan son sesyon yer.
Letan i ti prezant Lasanble avek en revi performans nou lekonomi e persepsyon pour larestan lannen 2014, Minis pour Finans, Komers ek Lendistri Pierre Laporte ti dir ki «parey in nou pratik dan sa bann dernyen lannen, apre ki nou’n fer en revi bidze leta pour ziska milye sa lannen, nou’n vwar li neseser pour reapropri serten saving ki nou’n realize dan serten kategori depans ver bann nouvo bezwen ki nou’n idantifye, e anmenmtan propoz serten lezot depans ki ganny konsidere koman priorite. »
Minis ti dir ki gouvernman pe demann selman 57.852 milyon roupi akoz larestan sa sonm larzan pou sorti dan saving ki gouvernman in fer.
« Pour dezyenm lannen konsekitif, sa bidze siplemanter i baze lo polisi gouvernman pour premyerman wvar savings dan son loperasyon ki ti’n fini ganny fer provizyon oparavan pandan bidze 2014. Sa bann savings i fer ki gouvernman i kapab reprioritiz son bann depans pour li kapab satisfer son bann lezot komitman pli kritik e enportan pour sa lannen. Sa bann savings i atraver plizyer fakter, tel ki freeze ki ti ganny enpoze lo recruitment pour bann minister, departman ek bann lazans sa lannen e osi anvi ki detrwa lòn sorti aletranze pour finans detrwa proze pa’n materyalize, » minis ti dir.
Msye Laporte ti azoute ki gouvernman in kapab fer provizyon pour kapab finans en sonm 5.7 milyon roupi pour preparasyon bann atlet, san nesesit fer demann siplemanter pour preparasyon pour Zwe-de-Zil 2015.
Bann depans adisyonnel i konm swivan:
1. Saler
En sonm 34,133,413.80 roupi, swa 15% dan sa sonm total ki pe ganny demande anba bidze siplemanter, konman depans adisyonnel pour saler.
• Departman pour bann lantrepriz . Devlopman e Inovasyon Biznes ki fek ganny formen i bezwen en sonm adisyonnel pour en sonm 426,845.55 roupi pour pey saler bann anplwaye ki okip bann pos kle dan sa nouvo departman.
• En sonm 303,527.12 roupi pe gany demande pour finans lapwentman bann pozisyon kle dan Departman Zafer Legal pour amelyor servis ki sa lofis i ofer piblik.
• Deparment Defans i bezwen finansman adisyonnel pour en sonm 6,299,554.52 roupi pour zot kapab pran plis dimoun dan lafors.
• Minister Zafer Entern ek Transpor i bezwen en sonm adisyonnel 11,217,249.98 roupi pour finans bann nouvo pos ki’n ganny vwar konman kritik dan sa minister, pour pey saler bann anplwaye ki deza pe travay e ki bidze pa ase, pour pey ‘shift allowance’ pour lapolis e pour finans scheme of service pour departman imigrasyon e civil status.
• Minister Resours Natirel i bezwen en sonm 92,363.05 roupi pour finans bann nouvo pos enportan.
• En sonm 5,878,379.89 pour Minister Lasante finans lanplwa bann nouvo graduates ek bann lezot pozisyon kle, lazistasyon dan scheme of service pour bann dental therapists, ki le lev nivo detrwa zot bann pozisyon, aziste sertan bann allowances.
• Lazans Transpor lo later: en sonm adisyonnel 1,384,902.99 roupi pour finans bann overtime.
• En sonm 8,530,590.70 roupi adisyonnel i bezwen pour Lofis Prezidan, Departman Lazenes, Departman Ladministrasyon, Zidisyer, Lofis Public Appeals Board, Minister Finans, Komers ek Lenvestisman, Minister Zafer Etranzer, Minister Labita ek Lakaz, Minister Lanvironnman ek Lenerzi ek Servis rescue ek servis tenny dife pour kouver saler staf.
2. Byen ek Servis
En sonm 43,503,310.94 milyon roupi adisyonnel i neseser pour goods and services. Sa i reprezant 19.4% dan total sonm siplemanter e sa pe gany distribye an swivan:
• Departman Defans pou bezwen en sonm 7,401,559.65 roupi anplis ki ti gany bidzete pour 2014 pour kapab finans reparasyon bato Andromache pour li kapab aste bann lekipman kominikasyon e osi liniform.
• Minister Lasante : en sonm 26,275,438.55 roupi an plis ki bidze 2014 pour aste latizann.
• Lazans Landscape and Waste management : en sonm 6,994,338.74 roupi pour li kapab aziste saler bann pti kontrakter netwayaz anvi revizyon dan saler minimonn sa lannen.
• En sonm adisyonnel 3,192,974.00 roupi pour bann lezot minister ki annan en defisit dan zot bidze ki’n ganny vwar pandan legzersis milye lannen.
• En total 13,469,839.46 roupi pe osi ganny demande pour bann lezot byen ek servis pour kapab kouver de depans dan overseas travel, Professional and Conultancy e unforeseen visits of dignitaries.
3. Transfer pour bann progranm santral gouvernman
Transfer pour bann progranm santral gouvernman i bezwen en sonm 129,501,082.92 roupi ki ekivalan 57% poursan sonm total ki pe ganny demande dan sa bidze siplemanter.
• En sonm 112,625,000.00 roupi pour gouvernman kapab onor son komitman avek Air Seychelles. Sa i a fer ki en sonm 5 milyon dolar dan sa 10 milyon dolar ki form par sa lagreman ant gouverman ek Etihad pou ganny peye e osi pour pey en sonm 3.5 milyon dolar ki ti form par pour kennsel lease agreement Air Seychelles sa letan.
• 8 milyon roupi i osi bezwen pour kouver pert operasyonnel SPTC.
• Gouvernman i bezwen 8,876,082.92 roupi adisyonnel pour bann lezot resours dan bann lezot lazans. Sa i enkli scheme of service pour bann public health officers e public health field assistants, logmantasyon dan kantite overtime ki SBC i peye e osi pour kouver saler ki manke pour sa bann lazans.
4. Lezot depans
En sonm 92,869.94 roupi pour kouver subscription to international organisation e osi Capital Subscription to international organisations anvi revizyon dan detrwa nou bann kontribisyon ki’n ganny fer par sa bann lorganizasyon ki nou form par.