Bann dimoun aze i selebre zot lazournen |02 October 2014

Alokazyon lazournen enternasyonal pour bann dimoun aze yer diferan lorganizasyon ti prepar en keksoz spesyal pour sa kategori dimoun.

Parmi bann aktivite ki ti ganny organize ti en rankont  ki ti deroul kot lasal NSC, Roche Caïman kot Departman Devlopman Kominoter an kolaborasyon avek Lasosiasyon Trwazenm-Az ti zwenn ansanm ek Konsey Nasyonal pour Lazenes pour en lanmes e plizyer aktivite pour egey bann dimoun aze ki sorti dan diferan distrik.

«Nou bann dimoun i tre kontan e lazournen pe byen deroule. Nou annan de ‘Live Band’ – Benn L’Echo e Lazenes SNYC – pour met lanbyans pour nou bann dimoun aze selebre,» Sylvanne Lemiel, direkter zeneral devlopman progranm ek levennman spesyal dan Departman Devlopman Kominoter, ti dir.

Osi prezan kot sa aktivite ti sekreter prensipal pour zafer sosyal Linda Melanie-William, depite sef egzekitif pour Konsey Nasyonal Lazenes Alvin Laurence,  parmi lezot envite distenge.

Parmi lezot aktivite pour sa lazournen ‘Seychelles Trading Company’ (STC) ti fer en donasyon kot Lakaz bann dimoun aze North East Point. Sef egzekitif STC Veronique Laporte ti prezant 6 set televizyon avek sa sant.

Sa donasyon ti ganny resevwar par Dr Danny Louange, depite sef egzekitif Lazans Lasante dan prezans ners ansarz Anne Desire, travayer STC, travayer kot lakaz bann dimoun aze e sa bann dimoun aze zot menm.

En lot lasosiasyon ki ti organiz en aktivite spesyal pour sa lazournen enternasyonal pour bann dimoun aze ti Fondasyon Jj Spirit ki ti organiz en dezennen pour trwa lakaz bann dimoun aze – Anse Etoile, Anse Royale e Pointe Larue.

Parmi sa bann group dimoun aze ti osi annan set dimoun aze sorti Praslin e La Digue.

Pandan sa dezennen fondasyon ti prezant en donasyon avek sak direkter sa bann ‘Homes’ apre ki zot ti’n diskit lo bezwen sa bann rezidans.
Nou seri portre i montre en pe bann aktivite ki ti’n ganny organize pour sa lazournen.