Lasanble Nasyonal i aprouv lamannman dan ‘Probation of Offenders Act’ |03 October 2014

Lasanble Nasyonal ti sa semenn aprouv lamannman dan ‘Probation of Offenders Act’ ki date depi 1966.

Ler i ti prezant sa proze-de-lwa, Minis pour Zafer Sosyal, Devlopman Kominoter ek Sport, Msye Vincent Meriton ti dir ki minister in vwar nesesite pour revwar bann provizyon sa lalwa, moderniz li kot i neseser pour pli byen zwenn bezwen nou kominote ek lazistis.

Parmi bann lamannman i en seksyon lo lord pour fer servis kominoter (Community Service Order) – sa i en lord lakour ki fer en endividi fer serten travay volonter dan bann landrwa spesifik. I osi enkli progranm reabilitasyon ensi ki edikasyonnel.

«Resers atraver lemonn in montre ki community service order i annan bokou benefis. I anmenn benefis pour lakominote ki osi ganny ede dan reabilitasyon kondannen. I benefisye kondannen limenm akoz zot kapab ganny sans repar enpe domaz ki zot in fer. Progranm ki zot pou swiv pou enkilke plizyer valer dan zot tel koman disiplin e ed zot devlop skil ek konfidans,» Minis Meriton ti dir.

En lot lamannman ki ti ganny propoze se revizyon rol e konpozisyon ‘Probation Committee’ e i ekspekte ki sa komite ava azout son rol pour asire ki bann dimoun ki ganny met lo probasyon zot swiv byen bann direktiv ek konsey bann zofisye probasyon e osi lenplimantasyon servis kominoter dan en fason ki lakominote a benefisye.