Tou i lo bon semen pour 29enm Festival Kreol |08 October 2014

Oktob in ariv ankor e sa i osi anons larive Festival Kreol, en levennman spesyal lo nou kalandriye nasyonal kot nou selebre nou kreolite ek kiltir, e zwenn ansanm avek lemon Kreolofonn.

Bann manm lo komite Festival Kreol pe zwenn pandan sa dernyen 10 semenn pour prepar pour sa 29enm festival.
Sa lannen, Festival Kreol pou ganny selebre pandan semenn 24 a 31 Oktob e en seri aktivite pou ganny organize pandan sa semenn.
Msye Marcel Rosalie, ki direkter zeneral pour kiltir e ki osi en manm lo komite, in dir ki preparasyon pe al byen pour sa festival e ki an zeneral komite i satisfe avek bann preparasyon.

I ti dir ki pandan sa mwan Oktob e sirtou pandan semenn 24 a 31 Oktob, bann lorganizasyon e osi bann distrik pe ganny demande pour organiz bann aktivite ki santre lo nou tradisyon ek kiltir kreol.

Lo kote sa festival limenm, Msye Rosalie in dir ki i annan en kad ki ganny servi pour sak lannen e ki bann aktivite popiler tel ki Moman Kreativite, Fon Lanmal ek Bal Asosye i touzour reste lo progranm.

Parmi bann nouvo aktivite lo progranm i trwa foronm lo tinge, moutya e larsitektir tradisyonnel.

Sa foronm lo larsitektir tradisyonnel pou konpri en prezantasyon lo ki fason pour prezerv e definir bann larsitektir tradisyonnel.

Osi nouvo sa lannen pou lansman sa konkour Kostim Nasyonal, zwe tradisyonnel dan Paradis des Enfants e Hype Beach Party.

En lot laspe nou kiltir ki vreman enportan se nou lakwizin. Msye Rosalie in dir ki sa lannen bokou lanfaz pe ganny mete lo nou bann manze tipikman kreol.

Msye Rosalie ti dir ki lo kote partisipasyon enternasyonal, bann delegasyon ek partisipan in fini konfirmen.

Manm piblik pe ganny demande pour vin partisip dan bann aktivite ki pou ganny organize pour sa 29enm Festival Kreol.

«Festival Kreol i sa letan ki anmenn nou a fon dan nou rasin e fer nou apresye nou kiltir dan tou son laspe, ki defini nou koman en pep kreol e konnekte nou avek lemonn kreolofonn,» Msye Rosalie ti dir.

Parmi bann lezot aktivite ki pou annan sa lannen i kwiz enterskoler ek enterdistrik, lafwar Kreol, Laserenad, Pipili, Dimans Kreol borlanmer, Tifin, Voyaz ek pyes teat.

Louvertir ofisyel sa 29enm Festival Kreol pou fer Vandredi le 24 Oktob dan Stad Popiler, e sa pou swiv par en konser mizikal.