Dimoun ki pe rod travay i ganny ankouraze pour pas atraver zofisye dan distrik |09 October 2014
Depi ki zofisye lanplwa ti ganny plase dan distrik an Out 2012 avek bi desantraliz sa servis, plis ki mil dimoun in ganny plase dan en travay atraver sa servis.
1,220 dimoun in ganny en plas travay atraver sa servis e ladan 237 dimoun ti lo lasistans byennet sosyal e 983 ti bann lezot dimoun ki ti pe rod en lanplwa.
“Sa i montre ki dimoun pe pas atraver sa servis dan distrik e i montre relevans e bezwen en tel servis o nivo distrik pour fasilit plasman dan lanplwa par Lazans Lanplwa Prive,” Minis pour Lanplwa ek Devlopman Resours Imen Idith Alexander ti dir dan Lasanble Nasyonal Mardi.
I ti azoute ki zis pour lannen pase, 619 dimoun ki ti pe rod en lanplwa e pas atraver zofisye dan distrik ti ganny en travay e sa ti enkli 139 dimoun ki ti lo byennet sosyal.
Minis ti dir ki statistik i montre ki sa servis dan distrik i efikas e pe kontribye pour enplimant stratezi gouvernman pour fasilit akse lanplwa pour lepep Seselwa.
Minis Alexander ti donn sa bann presizyon ler i ti pe reponn en kestyon poze par manm elekte pour Anse Etoile Melval Dugasse. Msye Dugasse ti’n demann Minis Alexander si i annan okenn evalyasyon ki’n ganny fer pour evalye efikasite bann zofisye lanplwa dan distrik pour refer dimoun ki pe rod lanplwa avek bann Lazans Lanplwa Prive.
“Lakantite plasman ki’n ganny fer i montre ki avek sa servis dan distrik en kantite dimoun pe ganny en travay e pour sa mon rekonnet lefikasite bann zofisye lanplwa ek Lazans Lanplwa Prive osi byen ki bann lezot partener e mon osi apresye ki manm piblik pe servi sa servis ki ganny met a zot dispozisyon e mon ankouraz lezot dimoun ki kapab travay e ki pe rod en lanplwa pour osi pas atraver zofisye dan distrik,” Minis Alexander ti dir.
Minis ti fer resorti ki ti an Out 2012 avek bi pour desantraliz sa servis e anmenn li pli pros avek bann dimoun dan kominote ki bann zofisye lanplwa ti ganny plase dan distrik par rezyon pour asiste dimoun sirtou bann ki lo lasistans byennet sosyal ganny en lanplwa.
Minis ti dir ki, parey tou proze, i enportan ki i annan en evalyasyon pour mezir performans e dan ka sa bann zofisye lanplwa, i ti dir i enportan ki son minister i evalye progre e lenpakt sa servis dan kominote dan distrik.
En tel evalyasyon pou osi ede idantifye defi avek bi pour sa minister travay dan en fason pour kapab amelyor sa servis, Minis Alexander ti fer resorti.
“Evalyasyon lo efikasite bann zofisye lanplwa dan distrik in deza komanse e pe ganny antreprann par seksyon policy planning ek resers dan Minister Lanplwa e i pou kouver peryod Out 2012 ziska Out 2014 e sa pour en peryod trwa mwan e i ekspekte terminen ver lafen sa lannen.
Sa evalyasyon i ganny divize an de faz:
• analiz statistik entern
• koleksyon lenformasyon atraver en kestyonner.
Minis ti fer remarke ki parmi bann defi ki son minister ek son bann partener in konstate e bezwen adrese baze lo analiz statistik entern ki zot in deza ranmase i kot serten dimoun ki’n ganny plase dan lanplwa pa pe reste dan zot travay pour plizyer rezon tel parey problenm latitid ek konportman dan travay; dimoun ki ti lo byennet sosyal pa montre lentere pour reste dan en travay permanan; bann zenn paran pa pare pour travay shift; serten anplwayer pa pe anploy serten group dimoun tel parey bann ki ti dan prizon, bann ki’n deza abiz sibstans, bann ki annan 50-an e plis.
Minis i dir son minister in not byen sa bann defi e byento dan dezyenm faz evalyasyon bann partener, manm piblik ek lezot dimoun ki servi sa servis pou ganny konsilte atraver en kestyonner e sa i a swiv par en diskisyon lo ki mannyer sa bann defi a kapab pli byen ganny adrese.
Me i ti fer resorti ki son minister i deza annan anplas en progranm e mekanizm pour adres serten sa bann defi tel parey progranm travay fleksib pour bann zenn paran.