Follow us on:

Facebook Twitter LinkedIn YouTube

Archive -Entertainment

Ledikasyon Lafanmir |18 October 2014

CARE i travay a plen tan pour fer ledikasyon, prevansyon e entervansyon dan domenn labi sibstans a tou nivo sosyete, an partikilye avek bann zanfan, zenn e lafanmir.

Dan son bann progranm CARE i donn lenformasyon, konnesans ek gidans pour ede konstrir REZILYANS parmi nou popilasyon.

CARE i pare pour travay avek tou dimoun e tou lorganizasyon kan i neseser e fezab.  

“Elve ou zanfan pour devlop en karakter pozitiv.”

Ser lekter

Sa seri i en kontribisyon anver ledikasyon pour lafanmir e i pou annan plizyer leson.  Dan son ansanm i en kour formasyon.  Mon envit sa ki anvi benefisye pour swiv sa kour dan Seychelles Nation.  Zot kapab osi partaz zot konmanter, sizesyon, leksperyans atraver bann pwen kontak CARE.

LESON 6

Lenportans enkilke respe-de-swa/lanmour prop (self-respect) dan ledikasyon spirityel zanfan

Si nou baz fondman nou lidantite imen, i lo krwayans ki nou zanfan “Bondye”, i neseser ki tre to nou zanfan I konn apresye valer sa lidantite inik, spesyal e sakre.  Se koumsa ki lanmour prop i kapab konmans devlope byen boner, dan premye 5 a 7-an lavi en zanfan.

Fondasyon

Sa fondasyon i tre enportan akoz menm si zanfan i kapab an mezir i grandi, devlop serten bon tre karakter, i pa pou neseserman demonstre sa bann tre toultan, si i napa en bon nivo ‘self-respect’.  Se pour sela ki souvann fwa nou zanfan i grandi dan kanmizri (shyness) e pa devlop konfyans dan zot menm.

Sa ‘self-respect’ pou baze lo en bon ledikasyon spirityel ki met lanfaz lo fer zanfan konpran son nobilite, son valer, son plas inik konman en zanfan Bondye e son responsabilite pour prezerv e fer grandi son spirityalite.

En kestyon ki nou tou paran nou kapab demann nou menm – Akoz ozordi nou pe vwar sitan zanfan rebel, perdi direksyon, al dan lerer, angaz zot dan drog ek lezot stil lavi ki detri zot nobilite?  Ki pe arive dan nou bann lekol, nou distrik e nou kominote?

Legzanmen-d-konsyans

Akoz i annan sitan santiman efreyante, perdi direksyon, depresyon e menm degou pour lavi?  Kwa ki kapab par deryer sa mank lapresyasyon e valer pour nou menm?  Eski nou lanvironnman familyal, sosyal, moral e kolektiv ki ankadre nou zanfan pour fer zot grandi byen i adekwat?  Kwa ki manke?  Ki nou’n perdi?
Petet enn, bann direksyon pour nou esey trouv semen pour resers larepons tou sa bann keksyon se retourn ver lanfans e egzamin kondisyon ki egziste pour elve zanfan.  Eski tou bann fakter dan lanvironnman kolektiv i ede pour enkilke e prezerv ‘self-respect’ nou zanfan?  Eski nou bezwen nou tou, travay pli for e pli profondeman pour elve e edik nou zanfan?

Karakteristik ‘self-respect’

Vwala detrwa karakteristik ki nou kapab obzerve dan zanfan ler zot annan en bon ‘self-respect’.  Zot annan konfyans dan zot prop lidantite e abilite. Menm ler zot fer fot zot kapab konpran vitman kwa ki’n al mal e korize.

Zot satisfe avek zot zefor pour letid e lezot laspe zot lavi.  Zot pare pour aprann e esey nouvo keksoz.  Zot annan respe e konsiderasyon pour lezot.  Zot konpran byen ki zot devwar e responsabilite pour fer en kontribisyon anver zot fanmir ek sosyete.  Zot santi ki zot paran e lezot i kontan zot e zot kapab an retour kontan lezot.  Zot annan tandans pour annan en latitid pozitiv anver lavi.  Zot annan lafyerte plito ki laprid.  Zot pare pour ede e apresye zot lakonplisman me osi kapab fer fas avek lesek.


Ki paran i kapab fer?

Aprann vin en meyer paran pour nou zanfan pa zanmen en keksoz fasil.  Nou tou nou bezwen konstaman egzamin nou menm; nou krwayans, nou panse, nou lemosyon, nou relasyon avek lezot, nou fason det e fason fer.  Aprann vin en meyer paran i en laprantisaz tou nou lavi – i demann zefor, sakrifis, lanmour, konpasyon e osi lakseptans pour nou met nou o servis nou zanfan.  Vin en meyer paran i en vwayaz kontinyel akoz pour ki nou zanfan i grandi byen e vin bann adilt matir demen, nou osi nou bezwen kontinyen grandi e vin pli matir.  Pa bliye ki o fon nou leker adilt i annan touzour sa zanfan anndan nou menm, ki bezwen konprenezon, lafeksyon e lanmour.  Sa ki nou bezwen pour nou menm se sanmenm sa ki nou bezwen ofer nou zanfan.

Legzersis 6

Pandan sa semenn ki pe vini:

•    Annou zet en regar lo ki mannyer nou pe ed nou zanfan pour li grandi byen dan son senk dimansyon imen: spirityel, fizik, mantal, emosyonnel e sosyal.

•    Eski parol ki nou servi, zes ki nou fer, aksyon ki nou pran i ed zanfan pour fleri dan son ‘self-respect’ oubyen i kontribye pour detri li pti a pti?

•    Pa bliye ki lafason ki ou zanfan i santi lo li menm i ede pour determinen si i pou vin en adilt ki reisi ou fel dan son lavi.  Eski ou konnen ki ou zanfan i vreman santi?  

•    Eski ou annan dyalog regilye avek li?  Eski ou pe beni li oubyen ou pe modi li?

•    Pa bliye ki tou i konmans dan lakour, i kontinyen dan lakour e i fini dan lakour.  Ki kalite latmosfer zeneral i annan dan nou fanmir an se moman?  Eski nou kapab rod led pour amelyor keksoz?  Eski nou pare pour fer en pa dan bon direksyon pour amelyor nou fanmir?

•    Zwenn ansanm avek lezot paran swa kot ou legliz, ou lafwa relizyez, ou dan sant kominoter e organiz bann lesanz e partaz leksperyans ou vwayaz konman paran.

•    Envit bann endividi, lazans ek lezot sours kalifye pour ede senm bon mesaz e ledikasyon.  (Pour kontinyen……).

» Back to Archive