Ankor dife dan landfill |18 October 2014

Dife in repran ankor dan sa landrwa kot i zet salte (landfill) Providence, e Lazans Servis Tenny Dife ek Sovaz ti deplway en kanmiyon e sis zofisye pour ede met sa dife anba kontrol.

Ti ver 1er 15 yer apremidi ki sa lazans ti ganny alerte lo sa dife ki ti pe pran lo sa sit apre ki bann dimoun ki ti laba ti pe sey met dife anba kontrol me zot pa ti pe nobou fer li.

“Delo tousel pa pou kapab met sa dife anba kontrol. Avek led bann travayer ki pe zet blandespanny lo dife i fer louvraz pli fasil e nou pe estimen ki i a kapab pran nou 3 a 5erdtan pour tenny sa dife," Jones Madeleine, zofisye relasyon piblik kot sa lazans, ti dir.

I ti azoute ki "avek bann lanket preliminer nou pa war okenn levidans ki sa dife in ganny mete par ekspre. Si nou swiv depi ler ki sa premye dife ti pran ziska la, sa dife in repran apre ki nou war ki sa landrwa pa pe byen ganny peze e sa landrwa i deza tro o.”

Direkter Star Seychelles Bernard Croguennec ki son lakonpannyen i responsab sa landfill ti dir avek lapres ki « nou napa ase plas lo landfill, nou’n bezwen konmans met salte lo kanmarad e dan plas fer li rondi i plito kare e dan son bordaz i pa fasil pour met blandespanny e dife pe pran dan bann landrwa kot napa blandespanny. Nou pe swete ki sa problenm a rezourd avek louvertir nou dezyenm landfill ki sipoze fer pandan sa mwan ki pe vini ».