Kominike Lapolis |21 October 2014

Lapolis in raporte ki en madanm 60-an avek nasyonalite Alman i admit Hermitte Ward apre ganny tape avek en loto Beau Vallon.

Kondisyon sa madanm – ki’n sibir blesir tel ki kot kase, poumon perse, la-ans kase, dimal dan latet, son koud e plizyer krose lo diferan parti son lekor – in ganny dekrir konman stab.
 
Sa aksidan, ki ti ariv lo bus stop obor lotel Fisherman’s Cove, ti ganny raporte avek lapolis ver 7er25 Dimans swar.

Dapre temwen sa madanm, ki ti’n debarke dan bis ki sorti direksyon Beau Vallon, ti koup semen sorti par deryer bis.

Dapre rapor menm si drayver sa loto ki ti pe fer direksyon opoze ti pez fren letan i ti war sa madanm, ti’n tro tar.  

Drayver sa loto, en garson 18-an ki reste Mare- Anglaise, i an detansyon lapolis apre ki tes lalkol fer lo li ti montre ki nivo lalkol trouve  dan son lekor ti parlao limit preskrir par lalwa.

Lapolis pe fer lanket dan sa aksidan.
Akonpannyen isi lo vakans par son msye, sa madanm ti ariv isi le 7 Oktob e ti sipoze kit pei yer.