Zenn i aprann plis lo zot kreolite |23 October 2014

En group zenn ti rasanble Sanmdi pase kot Sant Lasante Lazenes pour en lazournen aktivite anba tenm ‘Zenn Kreol’.

I fer dezyenm fwa ki Konsey Nasyonal Lazenes (SNYC) i organiz en tel aktivite kot bann zenn i ganny sans konn plis lo zot kreolite, ki fason bann granmoun lontan ti viv e osi en lokazyon pour bann zenn kapab apresye zot kreolite.

Ti sef egzekitif SNYC Vicky Van Der Westhuizen ki ti ofisyelman lans sa aktivite dan prezans sekreter prensipal dan biro vis-prezidan Jeanne Simeon ek tyermenn lasosiasyon bann dimoun aze Jeanne D’arc Gerry, parmi lezot envite.

Dan son diskour Madanm Van Der Westhuizen ti dir “si 29-an pase nou gouvernman ti vwar li neseser pour annan en festival kot nou selebre nou kreolite ti annan en bon rezon par deryer. Nou kiltir i sa ki fer nou ete. Nou fason sanze, nou fason azir, nou fason manze e nou fason fer dan lakour e dan nou sosyete tou sa la i form sa pep ki nou ete.”

I ti azoute ki Sesel i diferan avek nenport ki pei akoz nou en pep ki annan en diferan kiltir.

I ti dir ki “si nou bann zenn i kapab pran tou nou kiltir e met li an pratik e gard son valer nou pei Sesel pou reste en pei diferan. I byen nou kiltir i evolye me i bezwen evolye dan en fason tre pozitiv ki a benefisye pa zis nou menm me nou zanfan demen.”

Parmi sa varyete aktivite ki ti’n ganny organize pour sa lazournen ti bann dyalog ek deba ant bann zenn avek bann dimoun aze ki ti prezan pour aprann lafason ki sa bann aze ti viv letan zot ti ankor zenn.

Zot ti menm koz lo lanmour e ti osi annan en defile pour konpar lafason ki bann zenn ti sanze lontan pour al en maryaz avek konmela.

Bella Damou