‘Romance Nostalgie’ dan Bel Air |23 October 2014

Bann zenn, moyenn-az ek twrazyenm-az  dan distrik Bel Air ti zwenn ansanm Dimans apremidi dan en aktivite kiltirel apele ‘Romance Nostalgie’ organize par ladministrasyon  sa distrik.

Osi prezan koman bann envite ti lezot trwazyenm-az sorti dan distrik Rivière Anglaise, Anse Etoile ek Glacis.
Sa ti dezyenm fwa ki sa aktivite kiltirel i ganny organize koman en avangou Festival Kreol ki demare demen.

Tou sa ki ti la ti kapab sant romans oubyen lezot sanson, dans bann ladans tradisyonnel oubyen modern.

Dapre administrater distrik Bel Air Alexandrine Zelia, zot fer sa aktivite koman en fason detann, kot bann zenn ek bann dimoun aze zot kapab apresye, dyaloge e esanz leksperyans dan bann diferan domenn kiltirel ansyen ek modern.

Lasal ti vreman montre zot lapresyasyon avek laplodisman ler bann diferan group ek endividi ti mont lo lasenn e parfwa perform parmi lafoul menm.

Zot tou zot ti an santan ler bann romans ek lezot sanson ti pe ganny performen. Detanzantan bann pti manzay kreol tel ki gato kreol ek papay tournen, moulouk, gato piman, chips, draze ek lezot ankor ti pe pase dan lasal. Sa ti mars avek en pti ver laperitif oubyen limonnad pour sa ki pli pti.

‘Romance Nostalgie’ ti ale ziska en pe tar kot tou sa ki ti la ti byen anmize.
Nou seri portre i montre enn de performans  pandan ‘Romance Nostalgie’.

Teks ek portre par Patrick Joubert