29yenm Festival Kreol - Kiltir Kreol i pran kontrol lavil Victoria |24 October 2014

Sesel in pare pour met son pli zoli rob konmdir santer Joe Samy e nou asire ki i enn ki byen kolore e atiran pour sa 29enm Festival Kreol ki demare tanto avek louvertir ofisyel dan Stad Popiler aparti 6er30.

Sa festival, ki toultan en lokazyon pour regroup tou sa ki koze, viv, respir kreol, pou deroul depi le 24 ziska le 31 Oktob.

Yer apremidi bann santer dan group Kassav ti debarke lo Erport Enternasyonal Sesel apre ki zot ti’n voyaz abor Air Seychelles pour vin vizit nou pandan sa letan ki Victoria, kapital lemonn kreolofonn, i akey son bann zanfan, zanmi ek fanmir kreol. Jacob Desvarieux ek Jocelyne Béroard, sa de manm group Kassav ki pli popiler, ti koz avek medya lokal e dir ki zot tre enpasyan pour performen demen.

«Mon tre kontan pour retourn Sesel pour en lot gran spektak. Mon’n anmenn ankor lanmizik zouk,»  Jocelyn ti dir.
Jacob li i ti dir ki i enpe fatige me ki tou keksoz pou OK pour sa gran konser.

Jacob Desvarieux ek Jocelyne Béroard, sa de manm group Kassav ki pli popiler, letan zot ti pe debarke lo erport Pointe Larue yer bomaten

Dernyen fwa ki sa group ti perform Sesel ti an 1991 e nou asire bokou i ankor rapel sa lanbyans formidab.
Alors, pa tarde al aste ou tiket pour sa enn konser ki pou fer demen, Sanmdi le 25 Oktob Stad Popiler.

Group Martinike Kassav pou osi met lanbyans pandan louvertir ofisyel sa festival tanto. Nou espere ki zot in reekout bann sanson parey Zouk La Sé Sél Médikaman Nou Ni, Syé Bwa, Wép, Soleil, Maman Kréyol, Mwen Alé, Fabiola ek Ba Nou Zouk La pour zot kapab partisip aktivman dan sa spektak.

Yer, lavey louvertir ofisyel sa festival, bann group, mizisyen ek santer Seselwa, Renyonnen ek Rodrige ti met bann dernyen latous avek zot preparasyon avan montre piblik ki zot annan pour ofer.

Lavil Victoria in osi ganny dekore pour sa Festival Kreol ki en levennman spesyal lo nou kalandriye nasyonal kot nou selebre nou kreolite ek kiltir, e zwenn ansanm avek lemonn Kreolofonn.

Bann moniman tel ki Bisantener, Linite ek Lorloz in ganny dekore avek bann diferan formasyon lalimyer. I osi annan bann tablo ki’n ganny met anpandan lo Laveni Lendepandans lo sak kote semen. Sa bann tablo fer par bann diferan artis renonmen dan Sesel in ganny reprodwi e ganny fer lo en pli gran dimansyon.

Bann aktivite lo progranm sa enn festival i enkli  Moman Kreativite, Fon Lanmal, Bal Asosye, trwa foronm lo tinge, moutya e larsitektir tradisyonnel.