Tifin i reanmenn maryaz tradisyonnel |28 October 2014

‘Tifin’ an Kreol i vedir bann pti manzay ki konmela nou apel snack. Nou gran paran ti konsonm tifin sirtou avek zot dite apremidi. Me tradisyonnelman, tifin ti osi prezan dan bann lafet tel ki lanniverser, batenm, premyer kominyon, lakonfirmasyon, fiansay ek maryaz.

Depi plizyer lannen, komite lorganizasyon Festival Kreol in deside fer reviv sa tradisyon dan sa levennman anyel, atraver en aktivite ki zot in zisteman apel ‘Tifin’. Si sa tifin modern ti komans avek en apremidi kot bann trwazyenm-az ti zwenn pour pran en tas dite akonpannyen avek gato kreol ek konfitir papay trounen, i’n avek letan pti a pti evolye. I’n pas atraver en parti delo zoranz ek kalou pour li vin en vre maryaz tradisyonnel avek gato letaz, lasante Marie Brizard ek dinen. E ki meyer fason pour fer reviv maryaz tradisyonnel ki dan Festival Kreol !

Dan sa aktivite ki ti fer Dimans dan sant kominoter Beau Vallon, en koup Alman privilezye ti dir « wi » an Kreol, dan en vre dekor e lanbyans maryaz tradisyonnel Seselwa : Laserenad, romans, diskour, zet bouke, ipip eksetera.

E dan en vre bal maryaz avek benn ‘Leve Tradisyon’ apre tou bann seremoni, bann konviv ti byen anmize ziska tar dan lannwit. Zis petar ki nou pa’n tann pete : savedir lasanm pa’n leve, oubyen Pak in fer avan karenm !