Follow us on:

Facebook Twitter LinkedIn YouTube

Archive -Festival Kreol

En voyaz dan lanpayaz lanmour |31 October 2014

Spektak ‘Voyaz’ dan Festival Kreol in gard tou son promes e i’n ofer piblik tou sa sarm ek sansibilite poetik ki aprezan in vin en tradisyon ki akonpanny li tou le lannen.

Dan sa resital ki ti fer Merkredi swar dan Theatre des Palmes Mont Fleuri, lodyans ti kapab apresye san dout enn bann pli zoli spektak dan Festival Kreol sa lannen. Sa ti zis rezilta talan kolektif poet sorti dan ‘Lardwaz’ – sa lasosiasyon ki reini bann ekriven Seselwa : Helda Marie, Stephanie Joubert, Nathasha Belmont, Edwin Henriette, Georgette Larue, Marie Clarisse, Giovani Ally, Genevieve Morel, Raspyek e Manisha Bristol.

Zot ti ganny akonpannyen lo lasenn par en zenn poet Reinyonnez, Kaloune ; e Dereck Louise ki ti ofer zoli son gitar e djembe. Spektak ti met ansenn par Christian Servina.

Menm si tit sa spektak ti ‘Lanpayaz lanmour’ lodyans  pa’n zanmem santi li anpaye pandan sa 53 minit ki i’n dire. Annefe, sa bann poet in anmenn zot piblik dan en voyaz lanmour kalm, sansyel, agreab e menm inoubliab. Gran silans bann spektater tou dilon spektak ti temwanny zot lapresiasyon.

Malerezman, zis en ventenn dimoun ki ti’n desann pour vin vwar sa resital. Kestyon se eski Komite Lorganisyon Festival Kreol in fer ase piblisite, oubyen si senpleman Seselwa pa ankor kapab apresye lapoezi koman en lar ? Pourtan si napa lapoezi napa lezot lar akoz tou morso lar i en poenm dan limenm, akoz i komans par en lenspirasyon e refleksyon dan laform bann mo, menm si sa i silansye !

« Bann ki pa’n vini, zot in mank en zoli spektak kot nou’n war lanmour dan tou son splander,» sekreter prensipal pour kiltir Manmzel Benjamine Rose in fer remarke.

 I’n promet pour fer repet sa spektak pour ki plis dimoun i a kapab apresye.

Vi ki dan son lansennman natirel e parfe sa voyaz ti en poenm dan limenm, nou zournalis in rekonstitye son bann pli zoli parol ki nou partaz avek zot dan laform en poenm (vwar bwat separe).

Bann portre ki akonpanny lartik i montre serten bann performans pandan ‘Voyaz’ Merkredi swar.

 

 

 


----

Dir li pour mwan ki mon kontan li
Mon touzour kontan li dan silans
Kan i asiz obor mwan
Mon lespas i sofe
Kan mon trouv son silwet an mouvman
Mon reste san pozisyon
Telman i fatig mwan
Mon sa skilptir vivan dan ou lavi
Mon ofer ou mon zoli bouke fler maron
Anbras krevas ou trou-d-bote
Mon anmoure avek ou
Mon annan en lobsesyon e se ou son non
Ou soley mon lasesres
Ou mon larkansyel
Tro sarze avek kouler
Silvouple sov mwan
Eksplik mwan parol sak petal
Lo ki mon leker i le pran lavol
Mon leker i ankor bat pour ou
Avek ou kontan i vin fasil
Ou pou pli roz ki makro dan boukan
Mon pa sa enn ki pou promet ou lesyel ek later
Epi kit ou ater
Kas kadnan mon limazinasyon
Zis mwan tousel ki annan lakle
Lanmour kat sezon
Lanmour i partaz tou
Garot garote roul roule
Brodri lanmour
In tonm dan trou lanmour
Ou lanmour i pli for
Pa parey pour sa enn
Ou kares i si tann
Son douser i toutafe en lot
Bondye in kre zonm
E fanm pour son konpanny
Alor i normal si zot kontan
Si entel pa trai mwan
Nou a rezwenn



M.S

 

 

 

» Back to Archive