Ankor en dimoun i mor dan aksidan lo highway |31 October 2014

En zonm 56-an, Emmanuel Malvina, ti perdi son lavi dan en aksidan lo highway yer bomaten.

Msye Malvina ki reste Takamaka ti pe mont dan direksyon sid lo son moter letan en transpor lapolis ki ti pe dray par en travayer part-time avek Departman Lapolis ti tap li. Sa aksidan ti ariv ant biro lakonpannyen telekominikasyon Airtel avek Intelvision, Providence en pti pe  apre 9er bomaten.

Letan zournalis Nation ti ariv dan landrwa kot aksidan ti’n arive enpe apre 10er bomaten, Msye Malvina ti’n fini ganny transporte Lopital Sesel kot i ti ganny deklare mor enpe letan apre.

Lapolis ti konfirmen pli tar ki sa viktim ti Msye Emmanuel Malvina.

En zofisye lapolis ki ti dan landrwa kot aksidan ti’n arive ti konfirmen ki sa aksidan ti arive letan sa transpor lapolis ki ti pe fer direksyon lavil ti deside pour overtake en transpor devan li e se la kot i ti al tap Msye Malvina ki ti pe monte dan direksyon opoze.

Sa drayver ki reste La Misère, li i an detansyon lapolis antretan ki lanket i kontinyen.

Sa i fer 11enm aksidan fatal pour sa lannen e i vin zis landmen apre en progranm Dyalog An Direk lo  televizyon SBC kot ti annan bokou koze e osi temwanyaz bann fanmir ki pe soufer e ki ankor pe pler zot pros ki’n mor dan bann aksidan lo semen.

Portparol lapolis Msye Jean Toussaint in ankor en fwa lans lapel avek tou bann dimoun ki servi semen pour pran zot responsabilite e reste konsantre pour evite koz aksidan.

I ti azoute ki lanket pou ganny fer e sa ki koupab pour pey konsekans son aksyon.

Antretan ti annan en lot aksidan ver midi yer menm dan zanmerant legliz Pointe Larue ant en lanbilans ek en van Nissan e personn pa’n ganny blese grav.  Toulede transpor ti aparaman pe fer direksyon lavil. La ankor enn sa de transpor ti pe overtake letan aksidan ti arive. Sa trwa dimoun dan lanbilans ki ti drayver, en pasyan ek en porter ti ganny trete kot Casualty apre ganny large tandis ki drayver sa van ki ti litousel dan sa transpor pa ti ganny okenn blese.