Zenn artis i demontre zot talan dan lar vizyel |31 October 2014

Zenn Artis Kreolofonn i en aktivite konpetitiv ki’n aparet lo progranm aktivite Festival Kreol pandan plis ki 10-an.
Yer dan en seremoni kot Carrefour des Arts bann gannyan sa konpetition ti ganny zot pri dan prezans Minis pour Tourizm ek Kiltir, Alain St Ange; sekreter prensipal pour kiltir, Benjamine Rose; sef egzekitif Konsey Nasyonal pour Lar, Jimmy Savy; Mer Lavil Posesyon Lareinyon, Vanessa Miranville; Lanbasader Moris pour Sesel, Marie-France Roussety; bann artis; zanfan lekol ek zot ansennyan.

Minis St Ange ti ganny loner pour deklar ouver legzibisyon ki ti montre bann travay ki ti’n ganny anrezistre dan sa konpetisyon Zenn Artis Kreolofonn.
Sa lannen in annan 92 tablo e sa i plis tablo ki ti annan lannen pase.

Dan legzibisyon ti osi annan en kwen pour travay bann zenn sorti Lavil Posesyon, Lareinyon.

Sa lannen tenm konpetisyon ti baze lo Larsitektir Tradisyon e ti annan 4 kategori. Kategori 4 a 7-an in ranporte par Bella Sopha sorti lekol primer Anse Aux Pins, swivi par Alisha Thomas ek Jamilla Onezime toulede zot sorti lekol primer Takamaka.

Pour kategori 8 a 13-an premye pri ti al pour Janella Ernesta sorti lekol primer Au Cap, dezyenm pri ti al pour Norah Phare sorti lekol primer Takamaka e trwazyenm pri ti ranporte par Alanah Servina sorti lekol primer Anse Royale.

Kategori 14 a 17-an e kategori 18 a 21-an ti ganny dominen par lekol pos segonder Lar Vizyel.
Dan premye kategori (14-17an) Nathanielle Soomery ti sorti venker, swivi par Angie Pierre e Nelson Tamboo, tou le trwa sorti lekol Lar Vizyel.

Dan kategori 18 a 21-an tou le trwa gannyan ti osi sorti lekol Lar Vizyel : Maryse Camille ti sorti premye, swivi par son de koleg Alvaro Gutirrez e Christian Toussaint.

Bann tablo ki ti dan konpetisyon ti bann tablo ki ti ganny kree pandan en latelye ki ti ganny fer pandan vakans Out kot bann zanfan ti ganny led avek bann artis tel ki Colbert Nourrice parmi lezot ankor.

"Sa enn aktivite i en moman kot nou gete ki mannyer nou lar vizyel pe devlope parmi nou bann zanfan e osi se moman pour nou gete ki mannyer nou kapab kontinyen fer li devlope. Konsey Lar pe fer sa bon travay kot zot pe met bann zenn a lavan e pe ouver laport kot bann zenn i kapab demontre zot talan. E ozordi i en laprev kot konsey i lo bon semen pour travay ki i pe fer," Minis St Ange ti dir pandan son diskour.

Minis ti profite pour remersye Lareinyon pour son kontribisyon avek son bann tablo ki osi vivan e tre kolore.
"O non sekreter prensipal, non Konsey Nasyonal pour Lar e mon non personnel mon oule remersye zot tou ki’n ede pour fer sa enn aktivite. Mon oule remersye bann zanfan pour ki zot in pran zot letan vakans pour vin sa latelye e partisip dan nou konpetisyon e pli gran remersiman i al pour bann artis ki tre devoue pour edik nou bann zenn e gid zot ki zot a kapab pran larelev konman bann fitir artis letan ki zot bann artis konmela a antre dan ‘Wall of Fame’. Mon oule azoute ki gouvernman Sesel pou touzour la konman sa sipor e sa pilye pour fer nou bann artis bouz devan e mon asire ki zot semen fitir i annan en gran laklerte lo la ki a ed zot persevere," minis ti dir.

Pandan son ladres Msye Savy ti fer resorti ki bann travay sa lannen i plis ki lannen pase e menm son kalite i pli o.
« E se sa ki nou oule war pa zis kantite louvraz me bann louvraz de kalite akoz kalite i pli enportan," i ti dir.

Pli zenn venker dan konpetisyon, Bella Sopha, ti dir avek zournal Seychelles NATION : « Mon tre kontan ki mon’n ganny sa pri. Mon papa ki’n ed mwan ek mon desen e mon’n servi kreyon ek lapentir pour fer mon desen. »

Maryse Camille, venker kategori 18 a 21-an, ti dir : « Mon tre soke e tre eksite ki mon’n ranport premye pri dan mon kategori. Mon vwar sa pri konman en lakonplisman e en bon konmansman pour mwan konman en etidyan e konman en zenn artis. Mon fyer pour mon travay ki pe demontre larsitektir ki ganny entegre dan lanatir. Ti pran mwan de zour pour fer sa tablo."

Apre seremoni prezantasyon pri, bann envite ek bann partisipan ti fer letour dan legzibisyon pour regard bann tablo.