Demars pe kontinyen pour amelyor sor bann kondannen Seselwa Lezip |20 November 2014

Gouvernman Sesel i ankor pe fer tou sa ki i kapab pour esey ganny en santans lavi prizon pour sa 3 Seselwa ki’n ganny en kondannasyon lanmor pour trafik drog Lezip.

“Gouvernman pe fer bokou zefor pour angaz gouvernman Ezipsyen pour kapab ariv lo en konklizyon ki a omwen permet ki sa santans lanmor pa ganny aplike. Nou pe travay an respektan tou bann lenstitisyon Ezipsyen enkli  sa lakour ki’n pas sa santans. Nou pe demande pour ki sa santans i ganny revwar  baze lo lefe ki isi Sesel nou pa aplik santans lanmor me osi an regardan bann fe dan sa ka,” Minis pour Zafer Etranzer Jean-Paul Adam ti dir dan Lasanble yer.

Minis Adam ti donn sa bann leksplikasyon ler i ti pe reponn en kestyon par manm elekte pour Anse Boileau Bernard Arnephy.
Msye Arnephy ti’n demann Minis Adam pour donn detay Lasanble lo kondisyon sa 3 Seselwa ki’n ganny kondannen Lezip.

Minis Adam ti eksplike ki sitiasyon nou 3 konpatriyot i enn ki preokip tou Seselwa.

Pour sa ki konsern zot kondisyon Minis Adam i dir ki dapre rapor ki i annan zot kondisyon fizik ek mantal i ase bon me pour nenport dimoun ki pe fer fas avek en santans lanmor zot kondisyon mantal i difisil.

I ti azoute ki dan en tel sitiasyon fanmir sa bann kondannen zot osi bezwen bokou sipor, sirtou moral.
I ti dir ki menm si son minister pe donn tou sipor moral e konsiler ki posib sa pa vedir ki nou aksepte ou krwar ki sa krim ki zot in komet pa devret ganny rekonnet.

“Nou bezwen rekonnet ki en krim in ganny komet e en santans in ganny mete me nou priyorite  se travay pour fer ki omwen sa santans a ganny redwir a en santans lavi e pa sa santans lanmor. Nou pe osi demande ki gouvernman Ezipsyen i konsidere ki evantyelman sa 3 kondannen zot ganny transfer Sesel pour kontiny zot santans,” Minis Adam ti dir.

Swivan rapor ki resaman Prezidan Ezipsyen Abdul Fatah Al Sisi in siny en dekre ki pou permet prizonnyen etranze ganny anvoye dan zot pei pour fer zot santans, Minis Adam i dir menm si gouvernman Sesel in deza fer demars lo sa size i touzour pa kler si sa pou aplik pour bann kondannen ki’n ganny santans lanmor.

I ti enform Lasanble ki Prezidan James Michel in ankor en fwa ekrir Prezidan Al Sisi pour demande ki sa santans i redwir.

Minis Adam ti osi dir ki son minister in fasilit fanmir sa bann kondannen pour ki zot kapab omwen al rann en vizit zot pros.  Pandan sa vizit, ki ti deroul le 4 Novanm,  sa bann fanmir ki ti akonpannyen par sekreter deta dan Minister Zafer Etranzer Msye Barry Faure  ek anbasader Sesel pour Lezip Msye Joseph Nourrice ti osi rankontre avoka sa bann kondannen.

Konsernan kondisyon detansyon sa bann kondannen, Minis Adam i dir i ase difisil menm si zot drwa debaz pe ganny respekte e zot pa pe sibir okenn diskriminasyon.
Konsernan alegasyon ki sa 3 kondannen pa’n ganny en bon reprezantasyon legal, Minis Adam ti dir ki sa 3 Seselwa zot in ganny menm reprezantasyon legal ki kaptenn bato ki zot ti ladan e Minister Zafer Etranzer in fer tou demars pour siport zot.

“Me nou bezwen respekte lefe ki gouvernman Ezipsyen in atrap sa 3 dimoun avek drog e i annan tou drwa pour fer en prose devan lalwa,” Minis Adam ti eksplike.
Minis Adam ti osi fer resorti ki gouvernman Sesel napa mwayen pour pey en  avoka etranze pour defann zot ki kout tre ser dan bann tel ka.
Alor zot ti bezwen ganny defann par menm avoka parey kaptenn bato.

“Dezavantaz dan sa ka se ki zot pa’n kapab zwe sa kart konmkwa zot napa menm responsabilite ki kaptenn bato akoz ti en sel case e i petet i lo sa pwen ki serten dimoun pe dir ki zot pa’n ganny byen defann. Me mon kwar zot in ganny defann byen vi ki sa avoka i ganny rekonnet dan sistenm Ezipsyen konman en bon avoka,” Minis Adam ti eksplike.

Me i ti dir ki sa dezavantaz ek lezot pwen ankor ti ganny pran an kont dan prosesis lapel me la a sa staz kot lapel in fini tou stratezi pe ganny servi pour kapab redwir zot santans.

Tou an respektan drwa tou dimoun pour koz lo sa sitiasyon, Minis Adam ti profite pour lans lapel pour plis solidarite pour sa bann kondannen ek zot fanmir e demann bann zournal  pour pli konsyan lenpak lo bann fanmir sa ki zot pibliye lo sa size.

I ti demannn zot pour plito eksprim solidarite me non pa pour servi tou pti loportinite pou fer politik avek en sitiasyon ki konsern lavi e fanmir sa 3 dimoun akoz alafendizour tou paran i kontan zot zanfan e pou rod tou fason pour siport zot dan nenport ki sitiasyon.

Minis Adam ti ensiste ki meyer stratezi dan en tel sitiasyon i reste langazman avek gouvernman Ezipsyen e i ti demann tou dimoun pour respekte sa.