Des is best! |20 November 2014

Deza avek son fizik enpresyonnan, santer veteran lokal Despilly William i ofer en prezans remarkab lo lasenn.

E ki nou pou dir letan in met son gran sapo, zile ek semiz klate ek son gran soulye bout pwent blan ki form son resanz ‘cowboy’? Avek son gitar rouz, son lavwa enpresyonan e son danse orizinal, Des i vreman ‘best’ e i reprezant sa ‘grand master’ dan lanmizik Seselwa, parey limenm i pa ezite pour dir.

« Rar ou pou war dimoun 70-an Sesel ki kapab sante e danse parey Des, » i menm provok bann ki pli zenn ki li.

Parey ‘Bouz bouz dan ou leren’ ki enn son sanson pli popiler, Des i vreman konn bouze. E i menm sante e danse ziska ler son sang i degrafe!
Sete sa lanbyans dan sant konferans enternasyonal (ICCS) Sanmdi swar. Si zeneralman ou ekspekte en kado pour ou lanniverser, Des li ti fer lenvers e ofer son bann ‘fans’ en kado inoubliab alokazyon son 70enm lanniverser e son 50-an dan lanmizik. Piblik pa ti ezite pour rann li sa kado avek en lasal ki ti’n ranpli avek en bann spektater zwaye e antouzyast.

Pour sa lokazyon, Des ti’n envit son bann zanmi artis tel ki José Charles, Joe Samy, Jany, Essay Quatre, Alain Bacco, François Larue, Peter Jules ek lezot pour akonpanny li. Sirman i pa ti’n oubliye ki parey i kontan dir, son sanson soukous ‘Zimbou’ « in fer li popiler parmi bann zenes »: Travis, Ezy D e en group zenn danser enkli en fiy Despilly ti osi prezan pour aport sa latous modern !

Me i pa ti ezite pour averti bann zenn pour fer atansyon e « pa fer kaskou » parey tit enn son sanson ti dir. I ti demann zot pour fer parey li, reste orizinal e pa kopye lo personn.

« Pa fer kaskou ou a kas ou likou, ‘grand master’ i la, pa koz bokou. […] Mwan mon pa kopye lo personn. Tousala i fer par Des,» i ti dir avek lafyerte.
Pandan preski 2 erdtan e avek en lanmizik ki ti parfwa paret tro for, ICCS ti sofe e vibre avek en ventenn sanson ki’n mark sa artis Digwa pandan son parkour e ki’n sirman reanmenn bokou souvenir, parey ‘Top 10’ e ‘Top 20’ lo Radyo Sesel dan bann lannen 70 : ‘Bonzour Sesel’, ‘Pa obliy mwan jamais’, ‘Oli mon cheri’,  ‘Soley kouse’, eksetera.

Apre en pti voyaz lo ‘Silhouette’ avek son gate, Des ti finalman fer ‘Roule pti Aroah’ pour li retourn ‘Anse Réunion’. Sepandan, i’n konsey Joe Samy pour malgre ki i kontan La Digue e ki sa i son swe, pour pa al anter dan simityer l’Union avek bann kolon letan i mor, akoz « i pou al fatig zot ek son gitar ek son sanson » !

Des ki’n dir i ti komans fer spektak « depi ler larantre ti ankor 25 sou » ti’n anonse ki sa enn spektak ti pou son dernyen, parey son sanson i dir, « Mon pe ale ». Me parey sa sanson i kontinyen, « mon kontan ou, mon kontan ou », i telman kontan son bann siporter ki i’n finalman promet ki i pou retourn ankor.
« Personn pa dakor ki sa i mon dernyen ‘show’. Pli laz i monte prezan ki Des i for. Pa get mon laz me get kapasite Des. Des i annan 30-an devan li ankor, » i’n promet.

Sirman son bann ‘fans’ pou esper li avek enpasyans, pour zot kontinyen « dance alongside Des » !
Bann portre ki swiv i montre en pe lanbyans pandan ‘show’ Des Sanmdi swar.