Zanfan pre-skoler i zwenn pour en larzournen aktivite |20 November 2014

Bokou aktivite in ganny organize pour Lasemenn Pti Lanfans ki pe ganny selebre le 17 ziska 22 Novanm.

Parmi bann aktivite ti en lazournen kot bann zanfan day care ti pran par dan plizyer legzersis ki devlop zot bann gro mouvman.

Sa lazournen ti deroul yer dan lasal NSC Roche Caiman e bann day care ki ti partisipe i bann ki anrezistre avek Minister Ledikasyon.

I annan 21 day care ki anrezistre avek Minister Ledikasyon -- 18 lo Mahé, 2 lo La Digue e 1 lo Praslin. Sa aktivite ki ti fer yer ti zis pour bann day care lo Mahé e ti annan apepre 210 zanfan antou ki ti’n rasanble pour sa aktivite.

Antoinette Lucas, reprezantan Seksyon Pti Lanfans dan Minister Ledikasyon ti dir ek zournal Seychelles NATION ki sa i trwazyenm lannen ki en tel aktivite i ganny organize.

I ti dir ki sa i en lokazyon pour fer resorti akoz i enportan pour bann zanfan devlop zot bann gro mouvman.

Parmi bann zanfan dan sa aktivite yer ti en group zanfan pti lanfans sorti kot Lekol Eksepsyonel.

Bann aktivite ki ti lo progranm ti enkli sot dan serso, pas dan tinel, glise dan gliswar e sote lo tranpolin, parmi lezot.

I bon pour note ki devlopman gro mouvman i enkli bann misk ki dan lebra ek lipye ki permet en zanfan marse, taye, sote e fer zot annan lekilib ek kordinasyon.

Dapre bokou resers ki’n ganny fer atraver lemonn in ganny prouve ki zanfan i devlop zot bann gro mouvman atraver bann aktivite fizik tel ki taye, sote e grenpe. E ler bann zanfan i fer sa bann aktivite avek konfidans zot annan tandans pour zot fer bann lezot form ativite e zwe ki pou ed zot devlop plis ankor.