2enm edisyon ‘Parol ek Memwar’ in pibliye |21 November 2014

Apre sikse premye edisyon ‘Parol ek Memwar’: Récits de vie des Seychelles ki ti pibliye an 1994, 2enm edisyon sa liv in pibliye sa lannen e son lansman ofisyel ti fer semenn pase.

Sa ti pandan en konferans  ki ti fer kot sant kiltirel Nasyonal ki ti asiste par etidyan Liniversite Sesel, profeser, ekriven, lengwis, serser e tou lezot endividi ki enterese dan devlopman lalang ek kiltir Kreol.

Sa liv i en koleksyon leksperyans lavi enkli lavi lo zil e osi fason viv, koze, manze, aktivite sosyal, kiltirel ki plizyer dimoun aze ti  viv, temwanye e pas atraver dan zot letan lanfans  e ki zot in rakonte plizyer lannen pase dan zot prop fason koze.

Tou sa ki zot in rakonte plis ki 25-an pase sanmenm ki dan sa liv e i pou ganny prezerve pour bann zenerasyon alavenir.

Pandan sa konferans sa 2 lengwis ki’n travay lo sa liv -- Annegret Bollée, en lingwis Alman ki byen koni isi Sesel akoz i ti travay  avek Madanm Danielle de St Jorre lo premye lortograf Kreol Seselwa an 1978 swivi par premye diksyoner Kreol /Franse pibliye an 1982 e 2enm edisyon pibliye an 1999; ek Marcel Rosalie, direkter zeneral pour Kiltir e osi en serser -- ti koz lo sa liv e eksplik serten ekstre. En lot lingwis Alman Sibylle Kriegel ki’n travay bokou avek Madanm Bollé ti osi partisip dan sa prezantasyon.

Madanm Bollée i dir en tel liv i tre esansyel pour bann lingwis e osi bann serser ki etidye evolisyon bann diferan lalang.

“Pour bann lengwis en tel liv i en sours lenformasyon tre enportan akoz i bann transkripsyon fason koze spontane, egzakteman parey bann dimoun ti koze,” Madanm Bollée ti dir.

I ti azoute ki premye edisyon ti fer bokou sikse parmi bann lengwis e sanmenm ki’n ankouraz zot pour fer sa 2enm edisyon.
Lo son kote Msye Rosalie ti dir ki sa liv i prezerv diferan laspe nou patrimwann e i  pou fer ki zenerasyon fitir ava pli byen konpran sosyete ki zot paran e granparan in viv ladan.

“Nou pa kapab bouz de lavan san konpran nou pase. Se sa bann latras nou pase ki nou’n kapte e tire dan memwar sa bann dimoun aze e anpes zot ale san kit deryer serten latras ki menm si nou pa konnen ki mannyer zenerasyon ki vini pou servi me selman son konteni i temwanny diversite kiltir Sesel e i nou devwar pour konserv sa diversite,” Msye Rosalie ti eksplike.

Apre ki zot ti’n siny plizyer kopi sa liv, sa 2 editer ti ofisyelman prezant bann kopi avek reprezantan diferan lenstitisyon ki valorize e promouvwar devlopman lalang Kreol tel parey Lenstiti Kreol, Minister Tourizm ek Kiltir, Liniversite Sesel, Larsiv Nasyonal, parmi lezot.
Manm piblik i kapab aste kopi sa liv kot departman kiltir.