Follow us on:

Facebook Twitter LinkedIn YouTube

Archive -Religion

Lanmes tradisyonnel Takamaka demen |21 November 2014


Dan kad proteksyon leritaz relizye Takamaka, komite kiltirel an kolaborasyon avek ladministrasyon sa distrik pe organiz en lanmes tradisyonnel demen, Dimans le 23 Novanm apartir 9er30 bomaten dan Legliz Ste Marie Madeleine.

Sa lanmes pou en lokazyon pour reanmenn selebrasyon lanmes dan son fason tradisyonnel, ki en larises kiltirel enportan pour Takamaka.
Malgre son non e malgre bann eleman ansyen tel ki kantik an Laten, sa lanmes pou osi enkorpor serten laspe modern, tout an montran tranzisyon ant Laten, Franse e Kreol.

I a osi donn lokazyon bann fidel Takamaka ek zot bann envite pour renouvle zot lafwa.

Komite kiltirel Takamaka pe osi esey montre ki dan kad progranm Renesans Sosyal, en renesans moral i osi neseser pour kapab lit kont bann fleo sosyal tel ki drog, lalkol, prostitisyon, lapares eksetera, ki en menas pour nou bann zenn e pour devlopman nou pei. Koman en distrik, Takamaka pa ganny eparnye.

Lanmes pou swiv par en legzibisyon lo bann 'Figir Takamaka' dan sant kominoter aparti 11er.

Pou osi annan animasyon ofer par bann artis Takamaka ek bann zenn Perseverance ki pou bann envite spesyal pour sa lazournen. Pou osi annan kart Nwel ek kalandriye 2015 Takamaka anvant.

Tou dimoun i alor ganny envite Takamaka Dimans.
Komite Kiltirel Takamaka ti formen an Fevriye sa lannen avek bi kontribye dan proteksyon, promosyon e valorizasyon leritaz sa distrik ki en leritaz tre ris. Ziska prezan sa komite in egzekit en progranm ki enkli plizyer aktivite avek bi protez tou form leritaz.
 
I annan plan pour fer sa komite vin en lorganizasyon non gouvernmantal (NGO) dan lefitir.

 

 

 

» Back to Archive