Erport i resevwar en nouvo masin tenny dife |27 November 2014

Sekirite pour avyon lo Erport Enternasyonal Pointe Larue in ranforsi avek larive en nouvo masin tenny dife.

Sa pli gro masin ki servis tenny dife erport in deza annan e ki annan en kapasite 12 400 lit delo e 14 000 lit fom, ti vin an operasyon yer dan en pti seremoni kot stasyon lo erport.  

Sete sef egzekitif Lotorite Laviasyon Sivil (SCAA) Gilbert Faure e sekreter prensipal pour Transpor Patrick André ki ti ganny loner pour koup riban pour senboliz larive sa nouvo masin.

Osi prezan ti tyermenn bord SCAA Kaptenn David Savy, direkter zeneral pour Loperasyon Ronald Fock-Tave, sef zofisye stasyon erport Marc Brutus e lezot zofisye tenny dife.

Dan en pti diskour, Msye Faure ti dir ki SCAA in deside pour enport sa nouvo masin pour ki erport i kapab kontinyen fonksyonn an sekirite.

«Kot SCAA nou atas bokou lenportans a sekirite. SCAA pe depans 1.7 milyon dolar pour amelyor sekirite e prepar pour en evantyalite ki nou pa swete pou arive; en aksidan avyon lo erport. Napa pri pour lavi. Koman en manm ICAO (Lotorite Laviasyon Sivil Enternasyonal), nou bezwen swiv bann mezir tre strik. Si enn sa bann masin i kase, legalman nou pa pou kapab fer fonksyonnen sa erport,» i ti dir.

Depite sef zofisye stasyon erport Bernard Henriette in eksplike ki sa nouvo masin 39 tonn ki demar lo sis larou i premye parmi de ki SCAA in aste avek lakonpannyen Kronenberg ki baze La Olann. Sa dezyenm masin ki pli pti pou ariv dan pei an Fevriye lannen prosenn.

I’n azoute ki sa bann veikil i reponn a tou spesifikasyon ICAO e zot fabrikasyon in pran an kont lanvironnman ki i pou oper ladan.

Zot in menm spesyalman ganny konstri pour SCAA avek spesifikasyon ki bann enzennyer lokal in donnen. Sa i osi fer ki zot pli fasil pour mannye.

Sa bann enzenyer in menm al La Olann pour siperviz prodiksyon e ganny formasyon pour travay lo sa bann masin.

Bann teknisyen Kronenburg in osi vin Sesel pour form bann zofisye sirplas. Sa bann enzennyer ek zofisye ti resevwar zot sertifika konpetans pandan seremoni yer.

Avan antre an operasyon, sa nouvo masin tenny dife ti ganny benediksyon Dyak Louis Agathine.
I azout avek kat gro kanmiyon, en lanbilans ek de pick-up – enkli enn ki fek arive - ki servis tenny dife erport ti deza annan.