Zion I i beni nou avek ‘Bless Bless Bless’ |29 November 2014

‘Bless Bless Bless’ i tit nouvo album Zion I ki ti sorti en pe letan pase e ki sa artis lokal i dir pa pe tro mal vann.

Sepandan, sa santer ki dir nou ki son non lasenn i sorti direk dan lesyel, i santi ki mesaz dan sa albonm i telman for ki i pe demann plis dimoun pour aste en kopi.

Sa koleksyon rege, rege ‘tone’, ‘dance hall’ e ‘hip-hop’ i anvant Kot Do ek Ray’s Music Room a en pri R125 e R100 avek Zion I limenm.

«Sa i mon premye albonm solo. Oparavan mon’n form bann duo avek lezot artis. Sa albonm i rakont mon lavi limenm e i ranpli avek valer lavi tel ki valer moral e savwar viv,» Zion I i revel nou.

Kan i koz lo lavenir nou artis i dir ki i ti a kontan fer en spektak pour lazournen SIDA me ki i ankor pe rod en landrwa apropriye.

«Nou nepli kapab e i nepli tan pour fer spektak dan sant kominoter. Dan sant kominoter nou pa kapab atir bokou spektater. Depans i bokou, ler ou’n fini pey tou fre pa reste ou nanryen. Ladan menm bwar i aret vann boner e se lanmenm ler ki Seselwa i desann konmela,» i dir.

Zion I i azoute ki fodre annan en lot landrwa oplenner parey Stad Lanmizik.

«Lezot artis sorti dan lezot pei sirtou dan larezyon ti respekte sa vi ki nou ti sel pei ki ti annan enn sa stad rezerve zis pour lanmizik.  I annan nesesite pour nou reganny en landrwa parey,» i’n fer resorti.

I pa ankor tro tar pour aste dernyen albonm Zion I. Parey i rapel nou «aste orizinal».

Antretan, i’n anonse ki i pe travay lo en nouvo CD. Sirman son bann fans pou enpasyan pour pas en lot moman spirityel avek Zion I.

“Zion parey heaven, sa landrwa kot nou ti a kontan arive, ” parey i dir.